ASTANA. 14 mamyr. Qazaqstannyń belgili kásipqoı bokshysy Gennadıı Golovkınniń GGG Promotions promoýterlik kompanııasy iOS jáne Android operasııalyq júıelerindegi smartfondar úshin Gennady Golovkin qosymshasyn iske qosty. Bul týraly boksshynyń resmı saıty gggboxing.com habarlady.
Qosymsha boksshynyń jankúıerlerine arnalǵan. Ol jerde Golovkınniń áleýmettik jelilerdegi barlyq resmı paraqshalary jınaqtalǵan. Sondaı-aq, jankúıerler qosymsha arqyly sońǵy jańalyqtardy bilip qana qoımaı, boksshynyń sırek kezdesetin sýretterin kóre alady. Odan bólek, mátindik, dybystyq jáne vıdeo habarlama jiberýge múmkindik bar.
Ázirge jańa qosymsha úsh tilde jumys isteıdi. Olar: qazaq, orys jáne aǵylshyn tilderi. Aldaǵy ýaqytta ıspan tilinde de qyzmet kórsetedi dep kútilýde.
«Jańa gadjetti App Store jáne Google Play arqyly tegin júktep alýǵa bolady. Gennadııdiń álem boıynsha jankúıerleri óte kóp. Sondyqtan bul qyzmet túri boksshynyń ómiri týraly az ýaqytta bir jerden kóp málimetter alýǵa múmkindik beredi dep senemiz», – deıdi Golovkınniń menedjeri Oleg German.
Gadjet ózge qosymshalar tárizdi turaqty jańaryp, jetildirilip otyrady. GGG App qosymshasy Germanııanyń Bside-Me GmbH kompanııasymen birlesip jasalǵan.
Aıta keteıik, dańqty boksshymyz 17 mamyr kúni tańda AQSh-ta Vıllı Monroǵa qarsy kezekti jekpe-jegin ótkizedi.
Elaman Qońyr.
Derek, sýret: gggboxing.com.