Lıngvıstıkalyq komıssııanyń quramy bekitildi

Ortalyq saılaý komıssııasynyń tóraǵasy Qýandyq Turǵanqulovtyń tóraǵalyǵymen ótken Komıssııanyń keshegi otyrysynda 2015 jylǵy 26 sáýirge taǵaıyndalǵan Qazaqstan Respýblıkasy Prezıdentiniń kezekten tys saılaýyn uıymdastyrý men ótkizýge qatysty tórt qaýly qabyldandy. Atap aıtqanda, Qazaq­stan Respýblıkasynyń prezıdent­tigine kandıdattardyń memle­kettik tildi erkin meńgergendigin anyqtaý jónindegi lıngvıs­tıkalyq komıssııa qurý týraly sheshim qabyldandy jáne onyń quramy bekitildi. Komıs­sııa quramynda fılologııa ǵylymdarynyń doktorlary Myr­zataı Joldasbekov (tóraǵa), Seıit Qasqabasov, Faýzııa Oraz­baeva, Dıhan Qamzabekuly jáne Gúltas Qurmanbaı bar. Komıssııa músheleriniń barlyǵy qazaq tili men qazaq ádebıetiniń bilgir mamandary. OSK múshesi Lázzat Súleı­men­niń atap ótýinshe, Qazaqstan Respýblıkasynyń prezıdent­tigine kandıdattardyń memle­kettik tildi erkin meńgergendigin anyqtaý rásimi esh ózgergen joq, ol 2005 jylǵy 31 tamyzdaǵy «Qazaqstan Respýblıkasynyń prezıdenttigine kandıdattyń memlekettik tildi erkin meń­ger­gendigin anyqtaý rásimi týraly» Ortsaılaýkomnyń qaýlysymen aıqyndalady. Otyrysta, sondaı-aq, Ort­saı­laýkom Qazaqstan Respýb­lıkasynyń prezıdenttigine kandıdatty qoldaıtyn saı­laý­shylardyń durys qoldarynyń sany keminde 93 myń 012 qol­dy quraýy tıistigin bel­giledi. Qoldardy jınaýdy senim bildirgen adamdar uıym­das­tyrady. Qoldardy jınaıtyn toptardyń sany men mólsheri shektelmeıdi. Sonymen qatar,  Ortalyq saılaý komıssııasy qol qoıý paraqtaryn berý jáne Qazaqstan Respýblıkasynyń prezıdenttigine kandıdatty qoldap jınalǵan qoldardyń rastyǵyn tekserý merzimderin qysqartý týraly sheshim qabyldady. Qol qoıý paraqtaryn Ortsaılaýkom kandıdattyń Konstıtýsııa men «Qazaqstan Respýblıkasyndaǵy saılaý týraly» Konstıtýsııalyq zańda belgilengen talaptarǵa sáıkestigi tekserilgennen keıin eki kúntizbelik kún ishinde beredi. Buǵan deıin bul rásimge bes kún jumsalatyn. Al aýmaqtyq saılaý komıssııalarynyń kandıdatty qoldap jınalǵan qoldardyń rastyǵyn tekserý merzimi kúntizbelik on kúnnen bes kúnge deıin qysqartyldy. Otyrysta atalyp ótilgendeı, Ortsaılaýkom 2015 jylǵy 26 sáýirge taǵaıyndalǵan Qazaqstan Respýblıkasy Prezıdentiniń kezekten tys saılaýynda shetel­dik buqaralyq aqparat qural­darynyń ókilderi, Qazaqstan Res­pýb­lıkasy Syrtqy ister mınıstrligi bergen akkredıtteý týraly kýáligi bolǵan jaǵdaı­da, saılaýdy baıqaýdy júzege asyrýǵa quqyly ekenin belgiledi. Bul rette halyq­aralyq baıqaýshyǵa, sondaı-aq sheteldik buqaralyq aqparat quralynyń ókiline jeke basyn kýálandyratyn qujaty bolǵan jaǵdaıda, bir aýdarmashy ilesip júre alady. Atalǵan qaýlymen halyqaralyq baıqaýshy saýaldamasynyń mátini bekitilip, halyqaralyq baıqaýshylardy akkredıtteý 2015 jylǵy 20 sáýirde aıaqtalatyny belgilendi. Otyrysy aıaqtalǵan soń, Ortalyq saılaý komıssııasynyń buqaralyq aqparat quraldarymen tıimdi ózara is-qımyl jasaýyn, onyń qyzmetiniń jáne saılaý úderisiniń barlyq kezeńderiniń ashyqtyǵyn arttyrýdy, sondaı-aq, eldiń saılaý zańnamasynyń erejelerin kópshilikke taratý men túsindirýde mańyzdy ról atqarýdy qamtamasyz etýge negizdelgen baspasóz ortalyǵy ashyldy. Ortalyq saılaý komıs­sııasynyń baspasóz hatshysy Venera Jeksembekova habardar etkendeı, baspasóz ortalyǵynda jýrnalısterdiń jumys istep, aqparat alýlaryna barlyq jaǵ­daı jasalǵan. Internet, faks, telefon, taǵy basqa da qural­darmen jabdyqtalǵan. Baspasóz ortalyǵynyń al­ǵash­qy qonaǵy Lıngvıstıkalyq komıssııanyń tóraǵasy Myr­zataı Joldasbekov boldy. «Biz kezekten tys prezı­denttik saılaýdyń aldynda turmyz. Prezıdenttik saılaý­dyń ótýin saıası partııalar, qoǵamdyq uıymdar, úkimet­t­ik emes uıymdar, eńbek ujym­dary, stýdentter men oqytý­shylar qoldady, – dedi ol. – Eli­mizdiń Konstıtýsııasynda kórse­tilgendeı, prezıdenttikten úmitkerler birqatar talaptarǵa saı bolýy kerek. Olar birneshe synaqtan ótedi. Sonyń biri – bolashaq prezıdent memlekettik tildi erkin meńgerýi tıis. Al Komıssııa tıisti zańnamalar sheńberinde jumys isteıtin bolady». Álısultan QULANBAI, «Egemen Qazaqstan». sýret: http://qamshy.kz