Kolýmbııanyń ońtústik-shyǵysyndaǵy Gýavıare departamentinde qylmystyq toptar arasynda bolǵan qaqtyǵys saldarynan 52 adam qaza tapty, dep habarlaıdy Egemen.kz.
Qandy qaqtyǵys djýnglı aýmaǵynda bolǵan. Málimetke sáıkes, óńirdegi kokaın óndirisi men kontrabanda joldaryn baqylaýǵa talasqan eki qylmystyq top qarýly shaıqasqa túsken.
Kolýmbııanyń qorǵanys mınıstri Pedro Sanches atalǵan aýdanda áskerı is-qımyldardyń bolǵanyn rastady. Onyń aıtýynsha, beıbit turǵyndardyń qaýipsizdigin qamtamasyz etý úshin aımaqqa qosymsha áskerı kúshter jiberilgen.
Aıta keteıik, bıyl sáýir aıynda qaqtyǵysýshy toptardyń biri – Kolýmbııanyń revolıýsııalyq qarýly kúshteri quramynan shyqqan qarýly jasaq músheleri eldiń ońtústik-batysyndaǵy tasjolda terakt uıymdastyrǵan bolatyn.
Top jetekshisi Ivan Mordısko basqarǵan shabýyl kezinde jarylys bolyp, 14 adam qaza taýyp, taǵy 38 adam jaralanǵan. Zardap shekkenderdiń arasynda balalar da bolǵan.
Kolýmbııa bıligi óńirdegi jaǵdaıdy baqylaýǵa alyp, azamattardyń qaýipsizdigin qamtamasyz etý úshin qosymsha sharalar qabyldap jatqanyn málimdedi.
Eske sala keteıik, buǵan deıin Kolýmbııada áskerı ushaq apatqa ushyrap, 66 adam qaza tapqanyn jazǵan bolatynbyz.