Astanada kún jylyna salysymen masa men túrli shybyn-shirkeı qaptap, turǵyndardyń mazasyn qashyra bastady. Bıyl kún tolyq ysymaı jatyp-aq qansorǵysh jándikter kóbeıip, kóshede erkin serýendeýge kedergi keltirip otyr. Ásirese keshki ýaqytta saıabaqtar men turǵyn úı aýlalarynda masanyń kóptigi muńǵa aınalǵan. Terezeni asha almaı otyrǵan turǵyndar da jeterlik. Jylda qalany jándikterden zalalsyzdandyrý jumystary júrgiziledi. Atqarylyp jatqan jumystar týraly Egemen.kz tilshisi bildi.
Álem jyldan jylǵa jylynyp keledi. Sáıkesinshe, álemdegi eń sýyq astanalardyń qatarynda úshinshi oryndy ıelenetin Astana qalasy da ýaqyt ótken saıyn jylyp barady. Kún jylynǵannan bastap qalada masa kóbeıip ketedi. Saıabaqtar men alleıalarda jaıma-shýaq qydyrý múmkin emes. Qala turǵyndaryna terezeni ashý muńǵa aınalǵan.
«Keshke úı ysyp ketedi. Sol ýaqytta tereze ashaıyn deseń, masa qaptap turady. Aıaqtary erekshe uzyn, ushyrsań deneńde qozǵalmaı turady. Keshki serýenge uzyn jeńdi kıim kıip shyǵamyz. Sonyń ózinde kıimniń syrtynan shaǵady», deıdi qala turǵyny Elmıra Tileýova.
Astanada masa men shybyn-shirkeıge qarsy kúres kúsheıtildi
Rasynda elordanyń qansorǵyshtary qadalǵan jerinen qan almaı qoımaıtyn erekshe úlken bolyp keledi. Mamandardyń aıtýynsha, jándikterdi ýlaý olardyń dernásil kezinde bastalady. Jalpy qalada kólderdiń kóp bolýynan masa da azaımaı otyr. Onyń bir analyǵy 300 myńǵa deıin dernásil shyǵarady. Olardyń barlyǵy bir jazda jetilip ketpese de, ylǵaldy jerde birneshe jylǵa deıin saqtalady. Sondaı-aq qalada jaryqtyń kóp bolýy da masa men shybyn-shirkeıdiń azaımaýyna sebep bolyp otyr.
Elordada masany ýlaý jumystarynyń alǵashqy kezeńi aıaqtalǵan. Zııandy qanattylarǵa qarsy Reseı men Qytaı eliniń preparattary qoldanylǵan. О́tken jyldary úndistandyq dári de sebilgen. Alaıda qansorǵyshtardy azaıtýǵa bul preparattyń áli kelmegen.
«Entomologııalyq monıtorıng sáýir aıynda bastaldy. Mamandar sý qoımalaryn, onyń jalpy kólemin zertteı bastady. Al bizdiń tarapymyzdan óńdeý jumystarynyń alǵashqy kezeńi 20 sáýir-8 mamyr aralyǵynda júrgizildi. Zalalsyzdandyrý jumystary kezinde 120 adam jumys istedi. Olar qaladaǵy saıabaqtar, alleıalar, sý qoımalary men turǵyn úı alabtarynda ýlaý jumystaryn júrgizdi. Bul jumystar túnde, ıaǵnı 23:00-den keıin júzege asyrylady. Sebebi kúndiz jáne keshki ýaqytta halyq serýendep júredi», deıdi «Stolıchnaıa dezınfeksııa» JShS-niń atqarýshy dırektory.
Atyraýda masalarǵa qarsy kúreske drondar tartylady: Bıýdjetten 200 mln teńge bólindi
Qorshaǵan ortany qorǵaý jáne tabıǵatty paıdalaný basqarmasynyń málimetinshe, masalar ekojúıeniń bir bóligi bolǵandyqtan, olardy tolyq joıý múmkin emes. Degenmen, masa, sona, shirkeı sekildi qansorǵyshtarǵa qarsy óńdeý jumystary jyldaǵydaı sáýirden, qazan aıyna deıin jalǵasady. Dezınseksııa jumystaryna 120 maman, arnaıy búrký tehnıkalary men termogeneratorlar jumyldyrylǵan.
«Maýsym barysynda barlyǵy 6 kezeń josparlanǵan. Negizgi maqsat − masalardyń sanyn 90%-ǵa deıin azaıtý. Qansorǵysh jándikterdiń sanyn anyqtaý jáne azaıtý jumystary ǵylymı top pen sanıtarlyq-epıdemıologııalyq baqylaý mamandarynyń usynystaryna sáıkes jalǵasyp jatyr», deıdi Qorshaǵan ortany qorǵaý jáne tabıǵatty paıdalaný basqarmasynyń bólim basshysy Azat Turapbaev.
Masasy joq memleket
Bıyl birinshi kezeńde 13 myń gektar aýmaq óńdeldi. Al 13–20 mamyr kúnderi sý aıdyndarynda masa dernásilderiniń bar-joǵyna monıtorıng júrgizilgen. Ekinshi kezeń 22 mamyrda qalanyń ortalyq bóliginen bastaldy. Jumystar túngi ýaqytta − saǵat 21:00-den 04:00-ge deıin, ár kezeńde 20 kún boıy júrgiziledi.
Kún jylynǵaly elimizdiń barlyq aýmaǵynda jándikterge qarsy óńdeý jumystary júrgizilip jatyr. Máselen, masalary erekshe úlken dep aıtylatyn Atyraý qalasynda da ýlaý jumystary bastalǵan. Munda zııankesterge qarsy zalalsyzdandyrý sharalaryna dron paıdalanylady. Bul apparattar adam jete almaıtyn sý qoımalaryn ýlaıtyn bolady.