Almaty oblysynyń Esik qalasynda mektep túlekteri UBT-ny ınternettiń óshýine baılanysty qaıta tapsyrýǵa májbúr bolǵan, dep habarlaıdy Egemen.kz.
Oqıǵa týraly talapkerlerdiń biriniń anasy áleýmettik jelide jazdy. Onyń aıtýynsha, uly 28 mamyr kúni tańǵy saǵat 09:00-de test tapsyrǵan. Alaıda emtıhan aıaqtalýǵa nebári 20 mınýt qalǵanda testileý ortalyǵynda kenetten ınternet óship qalǵan.
«Ulym tańǵy 9-dan beri UBT tapsyryp otyrdy. Aıaqtalýyna 20 mınýt qana qalǵan edi. Sol kezde testileý ortalyǵynda ınternet óship qaldy. Testti aıaqtap úlgermegenderdiń nátıjeleri saqtalmaı qaldy. Endi balalar osy kúızelisti qaıta bastan ótkerýge májbúr, sebebi emtıhan jeksenbige aýystyryldy», dep jazdy ol.
Bul jaǵdaı áleýmettik jelilerde qyzý talqyǵa tústi. Qoldanýshylar testileýdi uıymdastyrý sapasyn synǵa alyp, mundaı mańyzdy emtıhan kezinde tehnıkalyq aqaýdyń qalaı oryn alǵanyna narazylyq bildirdi.
Pavlodarlyq oqýshy UBT-dan 140 ball jınady
Ulttyq testileý ortalyǵynyń málimetinshe, 20 mamyr kúni Qazaqstannyń birneshe óńirinde jáne 28 mamyrda Almaty oblysynyń Esik qalasynda ınternet qyzmetin usynatyn merdiger uıymdar tarapynan tehnıkalyq aqaýlar bolǵan.
Ulttyq testileý ortalyǵy talapkerler men ata-analardyń alańdaýshylyǵyn túsinetinin málimdedi.
«20 mamyrda ınternet qalpyna kelgennen keıin testileý 30 mınýttan soń jalǵasty. Al 28 mamyrda Esik qalasynda testti aıaqtap úlgermegen talapkerler úshin UBT 31 mamyrǵa, birinshi lekke aýystyryldy», delingen habarlamada.
Eske sala keteıik, buǵan deıin Ǵylym jáne joǵary bilim mınıstri Saıasat Nurbek jaryq óship qalǵan jaǵdaıda baǵalaý júıesi qalaı júrgiziletinin aıtqan bolatyn.