ASTANA. 15 mamyr. Qazaqstan adam kapıtalynyń sapasy boıynsha álemdik reıtıngte dúnıejúziniń 124 eliniń ishinde 37-orynda keledi. Bul týraly The Human Capital Report-tyń adam kapıtaly týraly esebine silteme jasap, tengrinews.kz habarlady.
Álemdik reıtıng ártúrli jastaǵy toptarǵa qatysty adam kapıtalynyń damý múmkindikterin ólsheıdi. Onyń ishinde bilim alý qoljetimdiligi men sapasy, biliktilikti arttyrý múmkindigi; jumyspen qamtylý, ekonomıkaǵa qyzyǵýshylyq bildirý jáne daǵdyny qalyptastyrý syndy máseleler qarastyrylǵan.
Bul reıtıngtegi Qazaqstannyń kórsetkishteri ártúrli. Máselen, úzdik kórsetkishter 55-64 jas aralyǵyndaǵylarǵa tıesili bolyp, atalǵan top álem boıynsha 12-orynǵa turaqtaǵan. Al 25-54 jas aralyǵyndaǵy top boıynsha elimiz 43-orynǵa taban tiregen. Burynǵy KSRO elderiniń ishinde Estonııa (16-oryn), Lıtva (18-oryn), Latvııa (23-oryn), Reseı (26-oryn) jáne Ýkraına (31-oryn) Qazaqstannan alda tur.
Adam kapıtalynyń sapasy boıynsha álemdik reıtıngte 1-oryndy Fınlıandııa aldy. Al 2-orynda Norvegııa, odan keıin Shveısarııa, Kanada men Japonııa tur. Sondaı-aq, alǵashqy ondyqqa Shvesııa, Danııa, Nıderlandy, Jańa Zelandııa jáne Belgııa endi. Bul tizimde Fransııa 14-orynda bolsa, AQSh – 17-shi, Ulybrıtanııa – 19-shy, Germanııa – 22-shi oryndy mise tutqan. Tizimniń eń sońǵy satysynda Iemen tur.
The Human Capital Report esebinde: «Adam kapıtalynyń sapasy boıynsha álemdik reıtıng bilim berý men maman qorynyń damý ósimin anyqtaý quraly bolyp tabylady. Aldaǵy ýaqytta qyzyǵýshylyq bildirgen taraptar jaǵdaıdy ońaltý úshin naqty sheshimder qabyldaı alady», – delingen.
Elaman Qońyr.
Derek: tengrinews.kz.
Sýret: hr-portal.ru.