AQTО́BE. 15 mamyr. Aqtóbede «Aqtóbe qalalyq sal aýrýyna shaldyqqan azamattardy qoldaý ortalyǵy» qoǵamdyq birlestiginiń ǵımaratynda «Paryz» qaıyrymdylyq aksııasy ótti. Aksııa barysynda múmkindigi shekteýl úsh adamǵa kómek kórsetildi. Bul týraly egemen.kz tilshisi habarlady.
Quralaı Báımenova jetekshilik etetin birlestik 16 jyldan beri kóptegen múgedek jandarǵa túrli baǵytta qoldaý jasap, «Paryz» qaıyrymdylyq sharasyn dástúrli ótkizip keledi. Sol dástúr boıynsha bıyl I top múgedegi Janar Esetovaǵa Ońtústik Koreıa elinde operasııa jasatý úshin 10 myń AQSh dollary tabystaldy. Bul qomaqty qarjyny ulty káris eriktiler jınap bergen. Sondaı-aq, aksııa aıasynda III top múgedegi Janargúl Izmatovaǵa Máskeýde em-dom qabyldaý úshin beıtanys jeke tulǵadan 400 myń teńge bólingen.
Shara barysynda taǵdyrlastaryna tartynbaı qol ushyn sozatyn Quralaı Báımenova da eleýsiz qalmady. Mereıli jasqa tolyp otyrǵan oǵan «Habar-servıs» JShS-niń dırektory Muhtar Ábilqaıyrov kópfýnksıonaldy-vertıkalızatorly, elektrli múgedek arba syılady.
Atalǵan birlestiktiń atqarýshy dırektory Gúlmıram Srajovanyń aıtýynsha, ortalyqta 1 200-den asa múmkindigi shekteýli azamat bar. Uıymda 30 adam qyzmet etedi. Qazirgi tańda shetelde ota jasatqaly otyrǵan Janardyń jol shyǵynyna qajetti aqsha jınalýda.
Aqtóbe qalasynda ótetin alaman aıtystan túsetin qarjy I top múgedegi Álibek Eleýsizovtiń Qytaıda arnaıy em alýy úshin jumsalmaq. Jalpy, birlestiktiń múmkindigi shekteýli jandarǵa ózderin qoǵamnyń tolyqqandy múshesi retinde sezinýi jolynda kóptegen ıgi isterge uıtqy bolyp kele jatqanyn aıtý lázim.
Satybaldy Sáýirbaı.
Derek, sýret: egemen.kz.