TARAZ. 15 mamyr. Jambyl oblysy ishki ister departamenti «Erlik – elge mura, urpaqqa – uran» atty baıqaýdyń qorytyndysyn jarııalap, memlekettik tildi oqytý kýrsyna belsendi túrde qatysyp, is-qaǵazdardy saýatty júrgize alatyn 38 tyńdaýshyǵa kýálikter berildi. Bul týraly egemen.kz tilshisi habarlady.
Jıynda Ishki ister mınıstrliginiń memlekettik tildi oqytý baǵdarlamasy boıynsha kýrsty bitirgen qyzmetkerlerge tilderdi damytý basqarmasynyń «Memlekettik tilderdi oqytý ortalyǵynyń» dırektory Kúlshat Keńesqyzy: «Aldaǵy ýaqytta qyzmet barysynda osy bilimderińizdi paıdalanyp, jaqsy nátıje kórsetedi degen úmittemiz», dep senim artyp, 38 tyńdaýshyǵa kýálik tabys etti.
Atalmysh baıqaýda ishki ister organdary qyzmetkerleriniń Uly Jeńiske, maıdanǵa, batyr babalarymyzǵa arnap shyǵarǵan óleńderi de synǵa tústi.
Jambyl oblysy ishki ister departamenti bastyǵynyń orynbasary, polısııa polkovnıgi Marat О́menuly: «О́tken kúnderdiń jeńisi – búginginiń jemisi ekeni belgili. Jeńistiń 70 jyldyǵy Otan úshin ot keship, óshpes dańq qaldyrǵan babalardyń erligi aldynda taǵy da basymyzdy ıemiz. Elbasynyń basty strategııalarynyń biri – ultaralyq kelisim men beıbitshilikti qoldaý. Endeshe, memlekettik til bólimi uıymdastyryp otyrǵan baıqaýdyń basty maqsattarynyń biri de osy. Ishki ister organdary qyzmetkerleriniń arasynda shyǵarmashyl qyzmetkerlerdiń baryn kórip, tek qoǵamdaǵy quqyqtyq tártipti qamtamasyz etip qana qoımaı, ózderiniń taǵy bir qyryn kórsetip otyrǵanynyń kýási boldyq», deı kele baıqaýǵa qatysýshylardy keshegi Jeńis merekesimen quttyqtady.
Sóıtip baıqaýǵa belsene qatysqan Qanaǵat Raıqulov, Darhan Myńtaev, Gúlnaz Mútálip, Nazgúl Jampozova, Mahambet Toktýbýlatov, Eńlik Nurmash, Janerke Seıdinabıeva, Danııar Rahymbaev, Jandos Núsipbaevqa ishki ister departamenti bastyǵynyń alǵys haty jáne baǵaly syılyqtar berildi.
Taraz qalasy ishki ister basqarmasy bastyǵynyń kadr jumysy boıynsha orynbasary, polısııa podpolkovnıgi Altynbalta Kósherbaev jáne Jambyl oblysy ishki ister departamenti jol potrýldik polısııa qyzmetkeri Ǵalym Jumahanuly «Kórkemsóz sheberi» nomınasııasymen marapattaldy.
Al, Jambyl oblysy ishki ister departamenti anyqtaý basqarmasynyń keńse jetekshi mamany Tolqyn Shynbolatova «Jýrnalıster tańdaýy» nomınasııasy men 25 000 teńgeniń chegine ıe boldy. Sonymen qatar, Qordaı aýdandyq ishki ister bólimi kadr jumystary tobynyń aǵa ınspektory, polısııa kapıtany О́rken Rahymjanov ózindik áýenimen, sóz aıshyǵymen erekshelenip, «Sazdy jyr» nomınasııasy men 25000 teńgeniń chegin ıelendi.
Budan bólek, júldeli oryndar ishki ister departamenti qujattamalyq qamtamasyz etý bóliminiń is júrgizý ınspektory Elmıra Anarkýlovaǵa, Jambyl oblysy ishki ister departamenti aqparattyq-analıtıkalyq ortalyǵy arnaıy memlekettik muraǵaty tehnıgi, polısııa kishi serjanty Jazıra Moldabaevaǵa, ishki ister departamenti zańsyz kóshi-qonǵa qarsy kúres jónindegi arnaıy jeke rotasy 2-shi vzvodynyń ınspektory, polısııa aǵa leıtenanty Nurym Qoıgeldıevqa buıyrdy. Osy baıqaýda oza shaýyp, baıqaýdyń barlyq talaptary men sharttaryn tolyq oryndap, óz týyndysynda órnekti oı, utymdy uıqasymen Otanǵa degen súıispenshiligin sheber jetkizip, eń úzdik tanylyp, bas báıgeni qanjyǵasyna baılaǵan aqyn polıseı Sarysý aýdany ishki ister basqarmasynyń ýchaskelik polısııa ınspektory, polısııa aǵa leıtenanty Narbekov Qanat Maratulyna qazylar alqasynyń tóraǵasy, ishki ister departamenti bastyǵynyń orynbasary Marat О́menuly 50 000 teńgeniń sertıfıkaty men dıplomy usyndy.
Oralhan Dáýit.
Derek, sýret: egemen.kz.