Sarykól aýdanynyń ortalyǵyndaǵy stadıonda aýdandyq spartakıada ótip jatqan bolatyn. Negizi bul sport básekesi aýdandar úshin jyl boıy kútetin jazdyń negizgi merekesiniń biri.
Sarykóldikter de tús áletinde sporttyq jarystardy qyzdyryp, mereke qyzyǵyn alańsyz tamashalap jatqan. Kún ystyq, aspan shaıdaı ashyq, tynyq. Bir kezde alystan shań kóringendeı boldy, ony stadıonda sporttyq jarystar qyzyǵyna túsken jurttyń kóbi baıqaı da qoıǵan joq. Álgi shań stadıonmen qatar ornalasqan saıabaqtyń qasyna kelgende stadıondaǵylar shańnyń tym aspandap, qoıýlanyp ketkenin baıqady. Biraq ne bolǵanyn ózderi de túsine almaı qaldy. Jurt tańyrqap qarap úlgermeı-aq, stadıonda alaman-tasyr bastaldy da ketti. Kıiz úıdiń týyrlyǵyn julyp tastady. Sýsyn, túrli taǵam satylatyn eki saýda shatyrynyń plastıkten jasalǵan tereze, shatyrlary qırap, synyqtary aspanǵa ushty. Tońazytqyshtardy aspanǵa kóterip, biraz jerge aparyp tastaǵan. Shatyr ishindegi satylatyn taǵamdardyń túr-túrin, tipti pisirilip jatqan káýaptardy, satýshylardyń saýdadan túsken aqshalaryn, basqa zattardyń barlyǵyn jurt aspannan kórdi.
Sarykóldik áriptesterimizdiń aıtýynsha, osynyń barlyǵy sanaýly mınýttarda ǵana bolyp, qara quıyn jylandaı jalmap júre bergen. Tabıǵattyń tosyn minezinen zardap shekkender de az emes. Eki jasar balany quıyn anasynyń qolynan julyp alyp, ushyryp áketken. Tez arada jetken «jedel járdem» dárigerleri balany aýrýhanaǵa aparyp, úsh kún emdedi. Aýdandyq aýrýhana dárigerleriniń aıtýynsha, bala ishinen jaraqat alǵan, búıregi aýyryp qalǵan. Biraq jaǵdaıy qalypty, ómirine qaýip joq. Sonymen qatar, aýrýhanaǵa jambas súıegi jaraqattanǵan, ushqan zattar tıip, jaraqat alǵan, denesin jyryp ketken kisiler de boldy. Túrli deńgeıde zardap shekken 12 adam aýrýhanaǵa kóringen. Dárigerler stadıonda adamdarǵa kómek kórsetken.
Sarykól aýdany orman-toǵaıy mol óńir. Tabıǵattyń mundaı tosyn minezin buryn kórmegen sarykóldikter úshin alapat quıyn kórgen tústeı boldy.
Názıra JÁRIMBETOVA,
«Egemen Qazaqstan».
Qostanaı oblysy,
Sarykól aýdany.