OlOl ASTANA. 4 aqpan. Qyzylorda oblysynyń ákimi Qyrymbek Kósherbaevtyń ókimimen Ǵaınýlla Zeınýllauly Jarqynbaev oblystyq ishki saıasat basqarmasynyń basshysy bolyp taǵaıyndaldy. Bul týraly «QazAqparat» habarlady.
Ǵaınýlla Zeınýllauly Jarqynbaev 1954 jyly Shymkent qalasynda týǵan. Almaty energetıkalyq ınstıtýtyn ınjener-elektrık jáne Qorqyt Ata atyndaǵy Qyzylorda memlekettik ýnıversıtetin ekonomıst mamandyǵy boıynsha bitirgen.
Ǵ.Jarqynbaev eńbek jolyn 1978 jyly Qyzylorda elektr júıeleri mekemesiniń ınjeneri bolyp bastaǵan. Ol 1989-1993 jyldary Qyzylorda qalalyq partııa komıtetiniń nusqaýshysy, uıymdastyrý jumystary sektorynyń meńgerýshisi boldy, 1993-1995 jyldary «Korda» «Qazaqstan-Túrkııa» birikken mekemesi bas dırektorynyń orynbasary, 1995-1999 jyldary oblys ákiminiń kómekshisi, oblystyq poshta baılanysy mekemesiniń bastyǵy, 1999-2009 jyldary oblys ákimi apparatynyń basshysy, oblystyq ishki saıasat departamentiniń dırektory, Qyzylorda qalasy ákimi apparatynyń jetekshisi qyzmetterin atqardy.
Al 2009 jyldan bastap osy kezge deıin oblystyq muraǵattar jáne qujattama basqarmasyna basshylyq jasap keldi.
Joldybaı Bazar.
Derek, sýret: Qyzylorda oblysy ákimdiginiń saıty.