ASTANA. 30 maýsym. Qaladaǵy bilim ordasynyń qara shańyraǵy sanalatyn Qorqyt ata atyndaǵy Qyzylorda memlekettik ýnıversıtetiniń bitirýshi túlekteri dıplom alyp, jańa ómirge qanat qaqty. Bul týraly Qorqyt ata atyndaǵy QMÝ-niń baspasóz qyzmeti habarlady.
Dıplom tapsyrý saltanatyna oblysy ákiminiń orynbasary Raýan Kenjehanuly men Qazaqstan Respýblıkasy Parlamenti Senatynyń depýtaty Murat Baqtııaruly jáne «Nur Otan» partııasynyń Qyzylorda oblystyq fılıaly tóraǵasynyń birinshi orynbasary Naýryzbaı Baıqadamov, «Abzal jáne K» tolyq seriktestiginiń dırektory, Qazaqstannyń Eńbek Eri Abzal Eralıev qatysty. Sondaı-aq, ýnıversıtet rektory, tehnıka ǵylymdarynyń doktory, professor Qylyshbaı Aldabergenuly Bısenov barsha qaýymdy merekemen quttyqtaı otyryp, túlekterge ystyq lebizin bildirdi. Rektor óz sózinde: «Bizdiń myńdaǵan túlekterimiz ýnıversıtette alǵan bilimderi men kásibı biliktilikteriniń nátıjesinde elimizdiń áleýmettik-ekonomıkalyq damýyna eleýli eńbek sińirip, tabysty qyzmet jasaýda. Bul – biz úshin úlken maqtanysh. Bizdiń túlekterimizdiń qatarynda esimderi elge tanymal qoǵam qaıratkerleri, memlekettik syılyqtyń laýreattary, Qazaqstannyń Eńbek Eri ataǵynyń ıegerleri, belgili ǵalymdar men ustazdar, dańqty sportshylar da bar. Sizderdiń aldaryńyzda turǵan eń basty mindet – ýnıversıtetten alǵan bilimderińizdi tájirıbemen ushtastyra otyryp, eńbek naryǵynda básekelestik qabileti joǵary kásibı tulǵa bolý», – dep erekshe atap ótti. Sonymen birge, ýnıversıtet basshysy úlken ómirge qanat qaǵyp otyrǵan árbir túlektiń elimizdiń rýhanı-mádenı, ekonomıkalyq-áleýmettik ósip-órkendeýine ózindik úles qosatyndaryna senim bildirdi. Sonymen óz kezeginde oblys ákiminiń orynbasary men kelgen qonaqtar bitirýshi túlekterge saltanatty túrde dıplom tabystady.
Aıta keteıik, ýnıversıtettiń 78 jyldyq tarıhy bar. Búginde bilim berý qyzmetinde ózindik dástúri qalyptasqan, respýblıkalyq, halyqaralyq bilim keńistiginde keńinen tanylǵan, ilim men ǵylymnyń, mádenıet pen ónerdiń qarashańyraǵy. Ýnıversıtet ınstıtýsıonaldyq jáne arnaıy mamandandyrylǵan akkredıtteýden, memlekettik attestattaýdan ótken aımaqtaǵy irgeli oqý orny. Munda Elbasy tapsyrmasyna saı naryqtyń ózgermeli jaǵdaıyna beıimdelgen, básekege qabiletti, kásibı bilikti mamandar daıarlaý baǵytynda 2012-2013 oqý jylynan bastap bakalavrıattyń 16 mamandyǵy oqý úderisin kóptildi bilim berý júıesi boıynsha júzege asyryp keledi.
Eń bastysy úsh tildi erkin meńgerý arqyly akademııalyq utqyrlyq, qos dıplom baǵdarlamalary aıasynda ýnıversıtettiń 50-ge jýyq stýdentteri men magıstranttary Amerıka Qurama Shtaty, Túrkııa, Avstrııa, Ońtústik Koreıa, Polsha, Egıpettiń joǵary oqý oryndarynda bilimderin jetildirip keldi.
Jalpy, bıylǵy oqý jylynda ýnıversıtetti 48 mamandyq boıynsha 1429 stýdent bitirdi. Al 296 túlek úzdik dıplom ıegeri atandy. Sonymen qatar, magıstratýranyń 29 mamandyǵy boıynsha kadrlar daıarlaıtyn oqý ornynan bıyl 163 bitirýshi ǵylym magıstri dárejesin aldy.
Saltanatty jıyn barysynda ýnıversıtettiń ár jyldardaǵy túlekteri, halyqaralyq, respýblıkalyq án baıqaýlarynyń jeńimpazdary «Turan» trıosy, Indıra Ahmetova, Nazerke Nuradınova jáne qazaq estradasynyń jas juldyzy, jerlesimiz Serik Ibragımov ánnen shashý shashyp, jastarǵa erekshe kóńil-kúı syılady.
Talǵat Raıymbek.
Derek, sýret: Qorqyt ata atyndaǵy QMÝ-niń baspasóz qyzmeti.