Daýysymyz – qýatty Qazaqstan úshin

Keshe Qazaqstan Respýblıkasynyń prezıdenttigine kandıdat N.Á. Nazarbaevtyń Respýblıkalyq qoǵamdyq shtab músheleri Pavlodar oblysynyń  óndiris obektilerinde bolyp, aımaq belsendilerimen kezdesti. Delegasııanyń quramynda Respýb­lıkalyq qoǵamdyq shtabtyń basshysy Muhtar Qul-Muhammed, «Nur Otan» partııasy Tóraǵasynyń birinshi orynbasary Baýyrjan Baıbek, Patrıottar partııasynyń tóraǵasy Ǵanı Qasymov, «Aq jol» demokratııalyq partııasynyń tóraǵasy Azat Perýashev, «Birlik» par­tııa­synyń tóraǵasy Serik Sultan­ǵalı, Halyq banktiń dırektorlar keńe­siniń tóraǵasy A.Pavlov, Parlament Máji­lisiniń depýtattary, QHA músheleri Oleg Dymov, Roman Kım, Májilistegi «Nur Otan» partııasy fraksııasynyń músheleri M.Pishembaev, M.Begentaev, A.Nurkına  jáne t.b. boldy. Pavlodar qalasynda N.Á.Nazar­baev­ty qoldaýshy – Qazaqstan elektrolız zaýytynyń metallýrgterimen, «Qa­zaq­stan Alıýmınııi» AQ energe­tıkterimen, Aqsý ferroqorytpa zaýy­tynyń, Eýrazııalyq energetıkalyq korpo­rasııa jumysshylarymen, sondaı-aq, «Ekibastuz qalasynda «Bogatyr-Kómir» AQ kásipornynyń jumysshylarymen kezdesýler  boldy. Budan basqa, RQSh músheleri Pav­lodar oblysynyń úkimettik emes sektory­nyń ókilderimen jáne Lý­gansk aýy­lyndaǵy Mádenıet úıinde «Lýgansk» ón­diristik koo­peratıviniń jumys­shylarymen kezdesti. Alǵashqy kezdesýdiń Qazaqstan elek­trolız zaýytynda ótkeni este qalarlyqtaı, munda osydan 7 jyldan astam ýaqyt buryn Elbasy osy kásiporyndy ashqan kezde bylaı degen bolatyn: «Men metallýrg retinde osyndaı zaýyt týraly armandaǵan edim. Endi Qazaqstan shıkizat óndirýmen jáne satýmen qatar, ony álemdik naryqqa shyǵarady». Máselen, 2009 jyly Qazaq­stan alıýmınııi Londonnyń metal­dar bırjasynda resmı tirkelgen bolatyn, al 2010 jyly álemdik deńgeıdegi  «Eý­ropalyq sapa» nagradasyna ıe boldy. Respýblıkalyq qoǵamdyq shtabtyń basshysy M. Qul-Muhammed óz sózinde atap ótkenindeı, Elbasynyń turaqty qoldaýynyń arqasynda Pavlodar oblysy Qazaqstannyń jańa ındýstrııalyq-ınnovasııalyq ekonomıkasynyń kósh basynan tabyldy. «Qýatty alıýmınıı óndirisi, jańa mys qorytý alyby, Aqsý ferro­qoryt­pa zaýyty, sondaı-aq, myna sizder eńbek etetin elektrolız zaýyty ár­bir pav­lodarlyq otbasynyń jaıly tur­mysyna senimdi negiz bolýda. Sondyqtan, men sizderdiń osynsha qamqorlyq jasaýshy Elbasyna daýys beretinderińizge sózsiz senimdimin!», – dedi Respýblıkalyq qo­ǵamdyq shtabtyń basshysy. Pavlodarlyqtar jedeldetilgen ın­dýstrııalyq-ınnovasııalyq damý baǵ­darlamasy úshin N.Á. Nazarbaevqa alǵystaryn bildirdi, atalǵan baǵdar­lamanyń sheńberinde ǵana sońǵy 5 jylda oblysta 94 joba iske asyrylyp, 11 000-nan astam jańa jumys orny quryldy. «Elbasy óziniń eńbek jolyn qara­paıym metallýrg bolyp bastady. Son­dyqtan, sizderdiń eńbekterińizdiń baǵa­syn, sizderdiń arman-múddelerińizdi, sizderdiń mańyzdy problemalaryńyzdy sóz júzinde ǵana emes, óz tájirıbesinen jaqsy biledi. Eńbek adamy – Memleket basshysy saıasatynyń, Birlik, Beıbitshilik pen Kelisim saıasatynyń tuǵyry! Aldaǵy bolatyn saılaý bizdiń birligimizdiń jáne Kóshbasshymyzdyń tóńiregine toptasatynymyzdy taǵy da kórsetetinine senimdimiz! Elbasyna daýys bere otyryp, biz turaqty, ósip-órkendegen jáne qýatty Qazaqstan úshin daýys beremiz!», – dedi Ekibastuz qalasyndaǵy «Bogatyr-Kómir» JShS-niń jumysshylarymen kezdesý barysynda «Nur Otan» partııa­sy Tóraǵasynyń birinshi orynbasary Baýyrjan Baıbek. Aqsý elektrstansasyndaǵy energetıkter áýletiniń ókili Svetlana Mahmýdova óz energetıkter áýletiniń jalpy eńbek ótiliniń 100 jyldan asatynyn aıtty. Qazaqstan táýelsizdik alǵannan beri kásiporynǵa jańa tehnologııalar engizilýde, óndiris jańartylýda. Osynyń bárine Elbasy saıasatynyń, ekonomıkamyzdyń ósýiniń, Qazaqstandaǵy beıbitshilik pen turaqtylyqtyń arqasynda qol jetip otyr, dedi ol. N.Á. Nazarbaevtyń kandıdatýrasyn qoldaý úshin saıası partııalardyń basshylary – «Aq jol» partııasynan Azat Perýashev, «Birlik» partııasynan Serik Sultanǵalı jáne Patrıottar partııasynan Ǵanı Qasymov sóz sóıledi.   Farıda BYQAI, «Egemen Qazaqstan». Pavlodar oblysy.