Saılaý naýqanynan qoǵamdyq birlestikterdiń de tysqary qalmaıtyndyǵy «Qazaqstan Respýblıkasyndaǵy Prezıdent saılaýyn baqylaý jónindegi respýblıkalyq komıssııa» respýblıkalyq qoǵamdyq birlestiginiń Astana qalalyq fılıalynyń buqaralyq aqparat quraldary ókilderimen bolǵan keshegi brıfınginde aıtyldy.
Belgili bolǵandaı, elorda qalalyq fılıalynyń quramyna qoǵamdyq birlestikter kóshbasshylary, kásipkerler, mádenıet qaıratkerleri jáne ózge de belsendi top ókilderi kirip otyr eken. Komıssııa tóraǵasynyń orynbasary, komıssııanyń Astana qalalyq fılıalynyń tóraıymy Tamara Lavrınenko kezekten tys prezıdenttik saılaýdy ótkizý barysynda eriktilermen jumys jandanatyndyǵyna toqtalyp ótti. Onyń aıtýynsha, eriktiler Astana qalasyndaǵy 250-ge tarta saılaý ýchaskesinde jumys isteıtin kórinedi. Qazir olarmen túsindirý jumystary júrgizilip, ádistemelik ádebıettermen tanystyrý ótip jatyr eken.
Bul rette, komıssııa óz jumysyn 2005 jyldan bastap júrgizgendigin, prezıdenttik jáne parlamenttik saılaýlar barysyna baıqaý jasaǵandyǵyn jáne de olardyń negizinde eriktiler úshin ádistemelik quraldar ázirlengenin aıta ketý kerek. Komıssııa tóraıymynyń sózine qaraǵanda, baıqaý barysynda oryn alǵan qatelikterdi qalaı túzeý qajettigi basty nazarǵa alynady. Onda da mundaı qatelikter men kemshilikter saılaý ótkiziletin kúnge deıin óz sheshimin tabýy tıis. Shtab qyzmeti týraly da sóz etildi. Ázirge ol óz jumysyn tańǵy saǵat 9:00-den bastap keshki 18:00-ge deıin jalǵastyrmaq. «QHA Qory» QQ dırektory, medısına ǵylymdarynyń kandıdaty Almagúl Sálimbaevanyń sózine qaraǵanda, 37-31-90 telefonyna nemese www.baikau.kz saıtyna habarlasyp, óz saýaldaryn qoıǵandarǵa naqty jaýaptar beriledi.
Sonymen qatar, qalaı eriktiler qataryna kirýge bolatyny, qandaı jańalyqtar oryn alyp jatqanymen de tanysýǵa múmkindik týǵyzylady. Jáne de bul baılanys quraldary táýlik boıy jumys isteıdi dep kútilýde. Saılaý naýqany barysyndaǵy baıqaýshylardyń mańyzdy róli týraly komıssııa tóraǵasynyń orynbasary, komıssııanyń Astana qalasy fılıalynyń tóraıymy Tamara Lavrınenko bylaısha sıpattap berdi: «Saılaý prosesindegi baıqaýshynyń róli – eń mańyzdy máseleniń biri. Baıqaýshy buzýshylyqtardy belgileý turǵysynan ǵana emes, olardyń aldyn alý boıynsha da qyrýar jumys isteıdi».
Sondaı-aq, brıfıngte sóz alǵan qoǵam qaıratkeri Arystan Jumaǵalı elimiz táýelsizdik alǵannan beri birqatar ózgerister bolǵandyǵyna erekshe nazar aýdartty. El azamattarynyń erik-jigeriniń arqasynda Qazaqstan órkendeý jolyna tússe, endigi kezekte elimizdiń demokratııalyq damýyna ózindik úlesterin qosýy tıis. Saılaýdyń nátıjeli ótýi barlyq qazaqstandyqtar úshin abyroıly mindet ári árbir qazaqstandyqtyń ortaq iske qosqan ıgi úlesi bolyp tabylmaq.
Asqar TURAPBAIULY,
«Egemen Qazaqstan».