Qazaqstan Respýblıkasynyń prezıdenttigine kandıdat Ábilǵazy Qusaıynov elordadaǵy «Astana-Zelenstroı» AQ kásipornynda boldy. Kezdesý kezinde Ábilǵazy Qusaıynov birlestik jumysshy-qyzmetkerlerin óziniń saılaýaldy baǵdarlamasynyń negizgi basymdyqtarymen tanystyrdy.
Prezıdenttikke kandıdattyń sózine qaraǵanda, HH ǵasyr men HHI ǵasyrdyń basynda bolǵan kúrt ekonomıkalyq ósim qorshaǵan tabıǵı orta múmkindikteri tıisti deńgeıde esepke alynbaı júzege asyryldy. Sóıtip, qorshaǵan ortaǵa asyra salmaq salyndy. Osynyń saldarynan Tabıǵat-ana tozyp, kóptegen ekologııalyq problemalar boı kórsetti.
Osyǵan mysal retinde Á.Qusaıynov jer resýrstarynyń kedeılene bastaǵanyn keltirdi. Onyń sózine qaraǵanda, mundaı jaǵdaı tabıǵı baılyqtardy tıimsiz paıdalanýdan oryn alyp otyr. Osylaısha jyl saıyn álemdik aýyl sharýashylyǵy aınalymynan shamamen 7 mıllıon gektardaı qunarly jer shyǵyp qalýda. Bul úderiske negizgi sebep – óse túsip otyrǵan ýrbanızasııa men sý jáne jel erozııasy, sondaı-aq, hımııalyq jáne fızıkalyq qýańdaný. Osy jáne basqa da ekologııalyq problemalardy dereý sheshý adam balasynyń aldynda turǵan basty mindet bolyp tabylady. Bul adamzattyń bolashaqtaǵy tirshiligi men tabysty damýy úshin qajet.
Kezdesýde sóz sóılegen Á.Qusaıynov adamzat qorshaǵan ortany qalaı ózgertkisi kelgenimen, Jer betindegi ómir tabıǵattyń qatań zańy boıynsha damyp kele jatqanyn atap kórsetti.
«Naq sondyqtan, adamzat órkenıeti óziniń ornyqty damýyn qamtamasyz etý úshin osy zańdar men qaǵıdattarǵa arqa súıeýi kerek. Tabıǵatpen úılesimdi ómir súrý – Adam balasynyń Jer betinde tirshilik keshýine negiz qalaıtyn basty qaǵıdattardyń biri. Kezinde uly fılosoftardyń ózi aıtyp ketkendeı, tabıǵatty onyń zańdaryna moıynsunyp qana baǵyndyrýǵa bolady», dedi ol.
Á.Qusaıynovtyń sózine qaraǵanda, Adamnyń Tabıǵatpen ózara is-qımyly ózindik erekshelikke ıe. Adam – aqyl-oı ıesi jáne bul oǵan óziniń tabıǵattaǵy orny men Jerdegi mindetin sezinýine múmkindik beredi. Búginde adam tutastaı planetanyń ekologııalyq damýy fýnksııasyn basqarýdy óz moınyna alýǵa tolyqtaı qabiletti.
Osy oraıda, bizdiń birinshi kezektegi mindetimiz – tabıǵı baılyqtardy tıimdi jáne josparly paıdalaný, qorshaǵan ortany lastanýdan qorǵaý, memlekettik baqylaý júıesin josparly negizde engizý. Osynyń barlyǵy, túptep kelgende, bolashaq urpaq qajettilikterin qanaǵattandyrýǵa jaǵdaı týǵyzatyn bolady.
Á.Qusaıynov ekologııalyq aǵartý qyzmetin mańyzy aıtarlyqtaı másele dep esepteıdi. «Biz balalarǵa jastaıynan ekologııanyń asa qarapaıym qaǵıdattaryn úıretip, olardyń boılaryna tabıǵat pen qorshaǵan ortany shyn máninde kózdiń qarashyǵyndaı saqtaý kerektigin sińirýlerimiz kerek», dedi osy oraıda Á.Qusaıynov.
«Astana-Zelenstroı» jumysshy-qyzmetkerlerimen kezdesýde, sondaı-aq, Qazaqstan Respýblıkasynyń prezıdenttigine kandıdat Ábilǵazy Qusaıynovtyń respýblıkalyq saılaýaldy shtabynyń jetekshisi Rústem Jolaman da sóz sóıledi.
R.Jolaman óziniń sózinde respýblıkalyq saılaýaldy shtabynyń qyzmetin uıymdastyrý týraly egjeı-tegjeıli áńgimelep, aldaǵy kezeńge arnalǵan jumys josparlary týraly jan-jaqty aıtyp berdi.
«Qazaqstan Respýblıkasynyń prezıdenttigine kandıdat Ábilǵazy Qusaıynov óziniń saılaýaldy baǵdarlamasyna sáıkes, jurtshylyqtyń nazaryn adam ómirindegi asa mańyzdy máselelerge aýdarmaq bolyp otyr. Máselen, ol búginde jáne bolashaqta adamzattyń tolyqqandy ómir súrýi tikeleı baılanysty bolyp tabylatyn planetamyzdaǵy ekologııa men bıologııalyq ártúrlilikti saqtaý máselelerin tý etip kótermek nıetinde», dedi sóziniń qorytyndysynda Qazaqstan Respýblıkasynyń prezıdenttigine kandıdat Ábilǵazy Qusaıynovtyń saılaýaldy shtabynyń jetekshisi Rústem Jolaman.
Elmıra MÁTIBAEVA,
«Egemen Qazaqstan».
ASTANA.