ASTANA. 1 sáýir. Búgin Qazaqstan Prezıdenti Nursultan Nazarbaev elimizge resmı saparmen kelgen Vengrııa Premer-mınıstri Vıktor Orbandy qabyldady. Bul týraly Aqordanyń baspasóz qyzmetine silteme jasaǵan egemen.kz tilshisi habarlady.
Kezdesý barysynda taraptar eki eldiń ózara yqpaldastyǵynyń keń aýqymdaǵy máselelerin, sondaı-aq halyqaralyq kún tártibindegi ózekti jaıttardy talqylady.
Memleket basshysy Qazaqstan men Vengrııa halyqtarynyń tarıhı turǵydan jaqyndyǵyna toqtalyp ótti.
«Biz Vengrııany naǵyz dosymyz dep sanaımyz. Elderimizdiń tarıhı tamyry ortaq jáne damý joldary uqsas. Vengrııa – biz úshin Eýropadaǵy mańyzdy tirek sanalatyn el», – dedi Nursultan Nazarbaev.
Qazaqstan Prezıdenti eki el yntymaqtastyǵy damýynyń údemeli qarqynyna nazar aýdardy.
«Bul bizdiń birinshi kezdesýimiz emes. Bul baılanystar bizdiń saýda-ekonomıkalyq qarym-qatynastardy nyǵaıtýǵa yqylasty ekenimizdi kórsetedi. Biz Vengrııanyń Eýropa odaǵy elderi arasynan alǵashqylardyń biri bolyp Qazaqstanmen strategııalyq seriktestik týraly kelisimge qol qoıǵanyn joǵary baǵalaımyz. Sizdiń saparyńyz nátıjeli bolýy, yntymaqtastyǵymyzdyń naqty baǵyttary boıynsha ýaǵdalastyqtarǵa qol jetkizilýi úshin biz qajetti kúsh-jigerimizdi jumsaıtyn bolamyz», – dedi Memleket basshysy.
Vıktor Orban óz kezeginde Qazaqstan Prezıdentine elge shaqyrý úshin rızashylyq bildirip, vengr halqynyń sálemin jetkizdi.
«Álemdegi kúrdeli ahýal jaǵdaıynda biz Sizdiń budan arǵy yntymaqtastyǵymyzdyń perspektıvalary jónindegi pikirińizdi bilýge múddelimiz. Qazaqstan Eýropa odaǵynda onyń bizdiń el sııaqty senimdi dosynyń bar ekenine senýine bolady. Býdapeshte biz Astana kóshesin ashqanymyzdy jetkizgim keledi. Biz saıası jáne mádenı baılanystarymyz tıisti deńgeıde dep sanaımyz, onyń ar jaǵynda Sizdiń qoldaýyńyzdyń turǵanyn da sezinip otyrmyz», – dedi Vengrııa Premer-mınıstri.
Vıktor Orban sondaı-aq Nursultan Nazarbaevtyń prezıdent saılaýyna qatysý týraly sheshimi Qazaqstannyń bolashaqtaǵy turaqtylyǵyn da qamtamasyz etýdiń kepili ekenin aıtty. Osyǵan baılanysty Vengrııa Premer-mınıstri óz eliniń atynan Memleket basshysyna zor tabys tiledi.
Murat Aıtqoja.