ASTANA. Aıaqtalýǵa taıaý qalǵan Qytaıdaǵy Azııa-Tynyq muhıt oıyndarynda Qazaqstan júzýshileri qola júldeni ıelenip, komandalyq úshinshi orynǵa shyqty. Bul týraly «Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń» baspasóz qyzmetkeri Tólegen Jákitaıuly habarlady.
Qytaıdyń Taıýan qalasynda estý qabileti tómen sportshylar arasyndaǵy tórt jylda bir ret uıymdastyrylatyn Azııa-Tynyq muhıt oıyndarynyń márege jetýine de az ýaqyt qaldy. Qazaqstandyq sýrdosportshylardyń osy dúbirli dodadan oljalaǵan júldesi az emes. Alǵashqy júldelerdi alǵan taekvandoshylar men jeńil atletshiler bolatyn. Buǵan deıin olar 1 altyn, 6 kúmis, 3 qola medaldy ıelenip, komandalyq segizinshi orynǵa taban tiregen edi.
«Jaqynda taǵy bir jaqsy jańalyq kelip jetti. Júzýden erler arasyndaǵy estafetalyq jarysta bizdiń jigitterdiń joly bolypty. Quramynda Nurlan Jasanov, Ernar Myrzaǵalıev, Marat Ermekpaev, Vıktor Frýndın esimdi sportshylar bar júzýshiler 4h100 metrlik (ýakyty: 4:14,77 sek.) qashyqtyq básekesinde qola júlde alyp, komandalyq úshinshi oryndy ıelenipti. Bul sport túri boıynsha birinshi oryn Japon, ekinshi oryn Qytaı komandalaryna buıyrǵan», deıdi Tólegen Jákitaıuly.
Sonymen, Qazaqstan sportshylarynyń Azııa-Tynyq muhıt oıyndarynan ázirge ıelengeni 1 altyn, 6 kúmis, 4 qola medal.
Dastan Kenjalın.
Derek, sýret: Dene múmkindikteri shekteýli tulǵalarǵa arnalǵan sporttyq daıarlaý ortalyǵy.
Sýrette soldan ońǵa qaraı: Azııa-Tynyq muhıt oıyndarynyń qola júldegeri atanǵan júzýshiler Nurlan Jasanov, Ernar Myrzaǵalıev, «Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń» atqarýshy dırektory Jumajan Imaıaqov, Vıktor Frýndın, Marat Ermekbaev.