«Aqnıet» kásipkerlikke jol ashady

Qıyr qonyp, shet jaılaǵan aýyldarda shaǵyn jáne orta bıznesti qalaı damytýǵa bolady? Jalpy, eldi mekenderde qandaı kásippen aınalysqan durys? Árıne, halyqqa kúndelikti tir­shilikte qajetti shashtaraz, naý­baıhana, balabaqsha, dárihana sekildi bıznespen shuǵyldanǵan paıdaly. Dúken ashyp, saýda-sattyqpen aınalysqannyń da jóni bólek. Durys delik. Endi oı bar, maqsat bar. Biraq qarjy joq. Sonda aýyldaǵy aǵaıyn kásipkerlikpen aınalysý úshin ne isteýi kerek? Qur qııaldyń jetegine erip júre berýge jáne bolmaıdy. Naqty ispen aınalysý úshin alǵashqy kapıtal qajet. Máseleniń bári qarjyǵa kelip tirelgende tyǵyryqtan shyǵar jol joqtaı bop kórinetin. Degenmen, munyń da reti tabyldy. Mysaly, Qyzylorda oblysynda sońǵy úsh jyl boıyna «Aqnıet» baǵdarlamasy iske asyp keledi. Baǵdarlama eldi mekenderde bıznespen shuǵyldanǵysy keletin adamdarǵa arnalǵan. «Aqnıettiń» tikeleı ómirge ke­lýine oblys ákimi Qyrymbek Kósherbaev muryndyq boldy. Al «Lýkoıl Oversız Servıs B.V» munaı kompanııasy qarjylaı kómektesedi. Atalǵan baǵdarlama boıynsha aýyldaǵy aǵaıyn 1 mıllıon teńgege deıin qaıtarymsyz qarjy ala alady. Bastysy, óz kásibiniń paıdaly ekenin dáleldese bolǵany. Aıtalyq, 2013 jyly «Aqnıet» boıynsha 77 adam arnaıy grant utyp aldy. Búginde olardyń jumysy dóńgelenip júrip tur. Al byltyr bul kórsetkish 20 adamǵa ulǵaıdy. Iаǵnı, 97 turǵyn naqty kásipkerlikpen aınalysa bastady. Al bıyl 94 adamnyń bıznes jospary maquldanyp, 1 mıllıon teńgege deıin qaıtarymsyz aqsha berildi. Sonda úsh jylda 268 adam grant alyp otyr eken. Bul osynshama kásipkerlik nysan ashyldy degen sóz. Az ba, kóp pe? Burnaǵy kúni «LÝKOIL Oversız Servıs B.V.» munaı kom­panııasy qarjylandyratyn «Aqnıet» áleýmettik-seriktestik baǵdarlamasy aıasynda jeńim­paz atanǵan 94 kásipkerge grant kýálikteri tabys etildi. Mara­pattaý rásimine Qyzylorda ob­lysynyń ákimi Qyrymbek Kósherbaev, «Lýkoıl Oversız Servıs B.V.» kompanııasynyń Qazaqstandaǵy fılıalynyń dırektory Andreı Kırıllov jáne aýdan ákimderi qatysty. Osy saltanatty shara barysynda 2013-2014 jylǵy jeńimpaz jobalardyń kórmesi uıymdastyryldy. Talpynysy zor bolǵanymen, qoldyń qysqalyǵynan is bastaı almaı júrgen 94 azamattyń bıznes jospary maquldanyp, 1 mıllıon teńgege deıin qaıtarymsyz qarjy berildi. «Aqnıet» baǵ­darlamasy boıynsha paıyzsyz ári qaıtarymsyz úlestirilgen qarajatqa Qarmaqshy, Jalaǵash pen Syrdarııa aýdanynyń tur­ǵyndary qol jetkizdi. Baı­qaýǵa múmkindigi shekteýli jandar, jal­ǵyzbasty analar, kópbalaly jáne turmysy tómen otbasylar men 18-den 30 jasqa deıingi jastar qatysqan bolatyn.  Aı­maq basshysy jeńimpazdardy quttyq­tap, olarǵa sertıfıkattar tabys­tady. – Oblys halqynyń 60 paıy­zy aýyldyq jerlerde turady. Qaıtarymsyz nesıe – aýyldyq jerde kásip bastaýǵa úlken kómek. Sondyqtan, aýyldyń ál-aýqatyn kóterý arqyly biz óńirdiń áleý­mettik ekonomıkalyq ahýalyn jaqsartpaqpyz. Kásipkerler – eldiń tiregi. Sizderge jaǵdaı jasaý – bizdiń mindetimiz. Shaǵyn jáne orta bıznes damysa, kásipkerlik órkendese, elde ekonomıkalyq damý da, turaqtylyq ta bolary sózsiz,– dedi Qyrymbek Eleýuly. «Aqnıet» baǵdarlamasynyń Qyzylordada júzege asyp jat­qanyna bıyl úshinshi jyl ekenin, osyǵan deıin baǵdarlama aıasynda 174 azamattyń óz kásibin ashqanyn aıttyq. Búginde olar ashqan shashtaraz, naýbaıhana, balabaqsha, jıhaz jáne kon­dıter sehy, dárihanalar, tis emdeý kabınetteri, balalardy saýyqtyrý ortalyǵy, kompıý­terlik ortalyq, tigin sehy sekildi halyqqa qajetti qyzmet túrleri el ıgiligi úshin jumys istep tur. Jospary maquldanyp, qarjysy qolyna tıgen myna 94 adamnyń da bıznes nysandary aldaǵy ýaqytta halyq muqtajdyǵy úshin jumys isteıdi degen oıdamyz. Erjan BAITILES, «Egemen Qazaqstan». Qyzylorda oblysy.