Kóshpeli májilistiń kókeıkesti túıini

Astana qalasyndaǵy «Park Inn» qonaqúıiniń májilis zalynda Turǵyn úı qurylys jınaq banki janyndaǵy Qoǵamdyq keńestiń kóshpeli májilisi bolyp ótti. Onda Astana qalasyndaǵy Saýran jáne №24 kósheleriniń qıylysynda ornalasqan kóppáterli turǵyn úı kesheni «saqaldy» qurylysynyń máseleleri qaraldy. Kóshpeli májilis otyrysyn Turǵyn úı qurylys jınaq banki (TQJB) janyndaǵy Qo­ǵamdyq keńestiń tóraǵasy, Qazaq­stan Jýrnalıster odaǵynyń tóraǵasy, belgili jýrnalıst Seıit­qazy Mataev ashyp, búgingi otyrystyń kún tártibin jáne oǵan qatysýshylardy tanystyrdy. Kóshpeli májiliske Qoǵamdyq keńestiń músheleri, Parlament Májilisiniń depýtaty Tursynbek О́mirzaqov, «Qazaqstan turǵyn úı qurylys jınaq banki» AQ basqarma tóraǵasynyń orynbasary Erbol Qarashúkeev, banktiń Ortalyq fılıalynyń dırektory Elmıra Qabylanbaeva, «Astana qalasynyń qurylys basqarmasy» memlekettik mekemesiniń basshysy Talǵat Ryspekov, onyń orynbasary Erjas Aıtýǵanov, turǵyn úı basqarmasy basshysynyń oryn­basary Mıra Baısúgirova jáne atalmysh turǵyn úı kesheni úleskerleriniń ókilderi qatysty. «Baqsam, baqa eken» demekshi, búgingi otyrysta tilge tıek etilgen másele elordadaǵy Saýran jáne №24 kósheleriniń qıylysynda ornalasqan «saqaldy» turǵyn úı qurylysy jaıynda bolyp otyr. Bul kóppáterli keshen qurylysy memlekettiń О́ńirlerdi damytýdyń 2020 jylǵa deıingi baǵdarlamasy aıasynda bastalyp, Astana qalasy ákimdigi qol qoıǵan kelisimge sáıkes osydan eki jyl buryn, ıaǵnı 2013 jyldyń jeltoqsan aıynda paıdalanýǵa berilýge tıis bolatyn. Biraq, alaıaq merdigerlerdiń kesirinen qurylys áli kúnge deıin bitetin emes. Sonyń salda­rynan Turǵyn úı qurylys jınaq bankiniń 242 salymshysy 2 jyl boıy áýre-sarsańǵa túsip, kúni búginge deıin «tabanaqy, mańdaı terlerimen» jınalǵan qarjylaryna alatyn páterlerine qol jetkize almaı júr. Qoǵamdyq keńes tóraǵasynyń aıtýynsha, bul máselege baılanys­ty TQJB salymshylary tarapynan túsip jatqan aryz-shaǵymdar tasqyny toqtar emes. Ústimizdegi jyldyń 9 maýsymynda Qoǵamdyq keńestiń kóshpeli otyrysy dál osy «saqaldy» qurylys alańynda ótkizilgen bolatyn. Sol jıynda Astana qalasy ákimdigi atynan «Astana qalasynyń qurylys basqarmasy» memlekettik meke­mesi basshysynyń orynbasary Erjas Aıtýǵanov sóz alyp, 2015 jyldyń 1 shildesine deıin turǵyn úı keshenindegi qurylys-montaj jumystary tolyq aıaqtalyp, 31 shildege deıin memlekettik komıs­sııanyń aktisine qol qoıylatyny týraly ýáde bergen bolatyn. Tipti, ol osy ýádesi oryndalmasa, «qyzmetimnen óz erkimmen kete­min», dep málimdeme jasaǵan edi. Oǵan sol otyrysqa qatysqan birneshe BAQ ókilderi de kýá bolǵan. Alaıda, sodan beri úsh aı merzim ótse de, «baıaǵy jartas, bir jartas» kúıinde qalyp, qurylys basqarmasy basshysynyń orynbasary Erjas Aıtýǵanov ta jyly ornyn sýytqan joq. Seıitqazy Mataevtyń aıtýynsha, búkil respýblıkamyzda osyǵan deıin Turǵyn úı qurylys jınaq banki salymshylary tarapynan qarjylandyrylǵan 7 «saqaldy» turǵyn úı kesheni bolǵan eken. Búgingi kúnge deıin onyń altaýy boıynsha másele tolyq she­shilip, úleskerler ózderine tıesili páterlerin alǵan. Tek osy elordadaǵy atalmysh turǵyn úı kesheniniń «jyry» biter emes. Jaqynda bul turǵyn úı kesheni salymshylarynyń bir top ókilderi Almatyǵa baryp, Qoǵamdyq ke­ńeske taǵy da shaǵymdanypty. Bul kóppáterli turǵyn úı úles­kerlerdiń qarjysymen salynyp jatqan qurylys bolyp tabylady. Sondyqtan, bank salym­shylarynyń múddesi Qoǵam­dyq keńesti syrt qaldyra almaıdy. Qysqasy, «saqaldy» turǵyn úı kesheniniń qurylysy qashan aıaqtalady? Kópshilikti tolǵandyryp otyr­ǵan bul kókeıkesti suraqqa «Astana qalasynyń qurylys basqarmasy» memlekettik meke­mesiniń basshysy Talǵat Ryspekov jaýap berdi. Onyń aıtýynsha, búginde bul qurylys nysanynda 100-den astam qurylysshy ýaqytpen sanaspaı eńbek etip jatyr. Qazir turǵyn úı keshenine jylý tartý máselesi sheshilýde. Bas merdiger tarapynan jiberilgen olqylyqtarǵa baılanysty bul turǵyn úı kesheniniń qurylysy sozylyp ketti. Endi bul másele tolyq sheshimin tabýda. Qazir turǵyn úı kesheniniń aınalasyn abattandyrý, asfalt tóseý jumystary da qolǵa alyn­ǵan. Qysqasy, qazan aıynyń sońyna deıin turǵyn úı kesheni paıdalanýǵa beriledi. Sóz kezegin TQJB janyndaǵy Qoǵamdyq keńestiń múshesi, belgili teledıdar júrgizýshisi Sergeı Po­namarev aldy. «Sizder osydan úsh aı buryn bul turǵyn úı kesheni paıdalanýǵa beriledi degen edińizder. Tipti, sizdiń oryn­basaryńyz Erjas Aıtýǵanov Qoǵamdyq keńes músheleriniń al­dynda, búkil BAQ ókilderi aldynda, tórt kameraǵa tikeleı qarap turyp, «turǵyn úı kesheni 31 shildede paıdalanýǵa berilmese, óz erkimmen qyzmetimnen ketemin» dep málimdegen edi. Mine, búgin sol orynbasaryńyz, Erjas Aı­týǵanov túk bolmaǵandaı taǵy ortamyzda otyr. Múmkin Erjas Aıtýǵanov jumystan ketýge búgin ótinish beretin shyǵar», dedi ol óz sózinde. Kelesi kezekte sóz alǵan Qoǵamdyq keńes múshesi jáne osy turǵyn kesheniniń úleskeri Aınur Baısaqalov S.Ponamarevtiń sózin jandandyryp, kópshilik aldynda bergen ýádesin oryndamaǵan E.Aıtýǵanovqa shúılikti: «Men sizdiń ornyńyzda bolsam, ýádem­nen shyǵý úshin osy turǵyn úı qurylysynyń sońǵy úleskeri páter kiltin alǵansha, páter jaldap turar edim», dedi. Qoǵamdyq keńes músheleriniń tikeleı aıyptaýlaryna Erjas Aıtýǵanov birden jaýap berdi: «Bul turǵyn úı kesheniniń paıda­lanýǵa berilýi meniń qyzmetten ketýime baılanysty bolsa, men qazir ótinish jazýǵa daıynmyn. Biraq, men jaýapkershiligin jete sezinetin sheneýnik retinde bul qurylys kesheni tolyq paı­dalanýǵa berilgenshe, minde­tim­di atqaratyn bolamyn. Biz bu­rynǵy bas merdigerdiń qyl­mys­tyq kemshilikterin sotqa ber­dik. Alǵashqy sot otyrysy biz­diń paıdamyzǵa sheshildi. Biz ádi­let­tilikke qol jetkizemiz. Al tur­­ǵyn úı kesheniniń qurylysy 31 qazanda tolyq aıaqtalatyn bola­dy», dedi «Astana qalasynyń qu­rylys basqarmasy» memlekettik mekemesi basshysynyń orynbasary. Bank salymshylary atynan sóz alǵan úlesker Qaırat Sultanov turǵyn úı kesheniniń qurylysy aıaqtalǵannan keıin Turǵyn úı basqarmasy úles­kerlerdiń bul páterlerge degen qujattaryn daıyndaýdy sozyp, áýre-sarsańǵa salmaı ma, bank salymshylary qatty sýyq túskenshe páterlerine kire ala ma, degen kúdigin ortaǵa saldy. «Biz eshkimniń de qyzmetinen ketip, jazaǵa tartylýyn qalamaımyz. Bizge páterlerimizdiń kiltin alsaq bolǵany. Mine, eki jyldan beri men zańdy baspanamdy kútip, páter jaldap shyǵynǵa batyp júr­min. Úleskerlerdiń barlyǵy derlik osyndaı qıyndyqtardy bastan keshirýde. Sondyqtan, biz úshin páter kiltin alýdan basqa arman joq», dedi ol sóziniń sońynda. «Astana qalasynyń turǵyn úı basqarmasy» memlekettik me­kemesi basshysynyń orynbasary Mıra Baısúgirova úleskerlerdiń sura­ǵyna jaýap bere kelip, bas­qar­ma tara­pynan qujattar daı­yn­daý­da eshqandaı kedergi bol­maı­tyndyǵyna sendirdi. Onyń aıtýynsha, turǵyn úı qurylysy paıdalanýǵa berilgendigi jónin­degi memlekettik aktige qol qoıyl­ǵannan keıin onshaqty kúnniń ishinde qujattar daıyn bolmaq. Otyrysty qorytyndylaı kelip, Qoǵamdyq keńes tóraǵasy Seıitqazy Mataev bul «saqaldy» qurylys qashan aıaqtalyp, turǵyn úı kesheni qashan paıdalanýǵa beriletindigin taǵy bir pysyqtap ótti. Oǵan «Astana qalasynyń qurylys basqarmasy» memlekettik mekemesiniń basshysy Talǵat Rys­pekov «turǵyn úı kesheniniń barlyq qurylys jumystary 31 qazanda tolyq aıaqtalady», dep naqty jaýap berdi. Jylqybaı JAǴYPARULY, «Egemen Qazaqstan». ASTANA.