Ortalyq saılaý komıssııasy tóraǵasynyń orynbasary Vladımır Foss kezekten tys prezıdenttik saılaýǵa kandıdat retinde taǵy tórt adamnyń tirkelgenin, kandıdattar sany 21 adamǵa jetkenin habarlady.
Onyń aıtýynsha, kandıdattardyń 18-i saılaýǵa ózin ózi usynǵandar. Eki kandıdatty, atap aıtqanda, N.Nazarbaevty «Nur Otan» partııasy, al T.Syzdyqovty Qazaqstannyń Kommýnıstik halyq partııasy usynǵan. Qazirgi ýaqytta úmitkerlerdiń saılaý talaptaryna sáıkestigi tekserilip jatsa, keıbiri Lıngvıstıkalyq komıssııaǵa synaq tapsyrý ústinde. «Segiz kandıdatty tirkeýden bas tartyldy. Olardyń 2-eýiniń jasy Konstıtýsııaǵa sáıkes saılaýǵa túsý jasyna tolmaǵan, 6-ýy Lıngvıstıkalyq komıssııa synaǵyn tapsyra almady. Tórt úmitker Lıngvıstıkalyq komıssııa synaǵynan sátti ótti. Olardyń saılaý talaptaryna sáıkestigi tekserildi. Qazirgi kezde senimdi ókilderin tirkep, qol jınaý jumysymen aınalysýda», – dedi V.Foss.
Sonymen qatar, ol keshe M.Telebekov, Á.Qusaıynov, S.Muqash jáne A.Amantaı Ortalyq saılaý komıssııasyna kelip, prezıdenttikke kandıdat retinde tirkelgenin atady. Budan bólek, V.Foos prezıdenttikke kandıdat retinde taǵy bir áıel tirkelgenin atap ótti. Ol – ýaqytsha jumys istemeıtin shymkenttik Aıgúl О́tepova. Endi bul kandıdat belgilengen tártip boıynsha Lıngvıstıkalyq komıssııaǵa memlekettik tildi erkin meńgergendigi jóninde synaq tapsyrady.
* * *
Keshe, sondaı-aq, BAQ ókilderine prezıdenttikke kandıdattardyń memlekettik tildi erkin meńgergendigin anyqtaý jónindegi Lıngvıstıkalyq komıssııanyń tóraǵasy Myrzataı Joldasbekov kandıdattyń jazba jumysy Ortalyq saılaý komıssııasyna tapsyrylǵannan keıin ony kórsetýge quqyqtary joq ekendigin málim etti. «Keıbir jýrnalıster kandıdattyń jazba jumystaryn sýretke túsirip alý úshin kórsetýimizdi ótinýde, – dedi ol osyǵan qatysty. – Biz mynany túsindirgimiz keledi, Lıngvıstıkalyq komıssııa synaq aıaqtalǵannan keıin, onyń qorytyndysyn jarııa etedi. Kandıdattyń jumysy meniń qolymda turǵanda, belgili bir deńgeıde ony kórsetýge quqylymyn. Biraq, jumysty Ortalyq saılaý komıssııasyna tapsyrǵannan keıin jazba jumysy resmı qujatqa aınalady. Sodan keıin ony kórsetýge quqymyz joq».
M.Joldasbekov bul máseleni keshe keıbir áleýmettik jelilerde prezıdenttikke kandıdattardyń memlekettik tildi erkin meńgergendigin anyqtaý jónindegi Lıngvıstıkalyq komıssııa tóraǵasynan úmitkerlerdiń jazba jumystaryn kórsetip, sýretke túsirip alýǵa múmkindik berýdi ótingen hattar jarııa etilgenine baılanysty málimdegenin aıta ketkendi jón sanadyq.
Álısultan QULANBAI,
«Egemen Qazaqstan».