ASTANA. 4 sáýir. Keshe Reseıdiń belgili telejúrgizýshisi Tına Kandelakıdi (sýrette) kórermender kenet Volgograd metrosynan kórip qalǵandarynda qatty tań qaldy. Bul týraly jergilikti «Krıvoe Zerkalo. Ru» habarlady.
Tanymal telejúrgizýshiniń qaharman-qalaǵa taban basýy RF úkimetiniń vıse-premeri Igor Shývalov, sport mınıstri Vıtalıı Mýtko sekildi tulǵalardyń osynda jasaǵan saparlarymen kezdeısoq týra kelip qalypty.
3 sáýir kúni Volgogradqa Máskeýden tutas bir desant saý etip kele qaldy. Bul saptaǵy úkimet basshysynyń orynbasary men sport mınıstri munda 2018 jylǵy mýndıalǵa daıyndyq barysyn kórýge kelipti. Bir kúnniń ishinde olar salynyp jatqan halyqaralyq termınaldy, «Pobeda» arenasy boı kóteretin alańdy, birneshe jańa meımanhanany kórip úlgerdi.
Al Tına Kandelakı bul kezde qalada óz jumystarymen júrdi. Edil jaǵasyndaǵy qalaǵa da ol óziniń jeke sharýasymen kelgen sııaqty. Bizge belgilisi, ol aldymen ózenniń jaǵasyna baryp, sýretke túsken. Sosyn ony áleýmettik jelige salyp: «Jaǵaladaǵy jaqtaýlarǵa súıenbeńizder! Paltolaryńyzdy tazalaı almaı qalasyzdar!» dep jazypty.
Budan soń Tına Mamaı qorǵanyna barý úshin metronyń «Komsomolskaıa» stansasyna túsken. Onyń esebin taǵy da Internetke salyp qoıypty. «Aýa raıy, árıne, onsha emes, biraq kóńil kúı kóterińki. Tramvaımen Volgograd metrosyna kele jatyrmyn. Bıleti 15 rýbl», dep jazady telejúrgizýshi.
Sodan keıin ózin tanyp qalǵan qyraǵy jolaýshylarmen eskertkish úshin sýretke túsipti. Alaıda, tanymal tulǵa qaharman-qalaǵa ne úshin kelgeni týraly tis jaryp, bir aýyz sóz aıtpaıdy. Kandelakıdiń ókili muny jumys sıpatynda emes ekenimen ǵana túsindiredi.
Tınaǵa qalanyń kórikti jerleri unaǵan. «Otan-Anany janynan kórý degen, árıne, keremet! – dep jazady ol. – Orasan zor aýqymdaǵy músin – Azattyq statýıasy men Rıodaǵy Hrıst Aıybyn jýýshy statýıasynan eki esedeı úlken. Aıtqandaı, ol salynyp jatqanda, qurylys ornyna beton tasýshy júk kólikteri tóbelerine lenta taǵyp alyp júripti. Osy arqyly baǵdarshamnyń «qyzylyna» qaramaı, toqtamastan óte beretin bolǵan. Al GAI qyzmetkerlerine olardy toqtatýǵa tyıym salynǵan. Mine, qandaı qurylys bolǵan deseıshi!».
Samat Qulymbet.
Mánbe, sýret: Krıvoe Zerkalo. Ru.