Premer-Mınıstrdiń orynbasary Berdibek Saparbaev Baıqońyr qalasyna arnaıy issaparmen keldi. «Soıýz TMA 18-M» kemesimen ǵaryshqa sapar shegetin ekıpaj múshelerimen kezdesti. Memleket basshysynyń tapsyrmasymen ekıpaj komandıri Sergeı Volkov, bortınjenerler qazaqstandyq Aıdyn Aıymbetov pen danııalyq Andreas Mogensenmen pikirlesip, sátti sapar tiledi.
– Búgin eliń men Elbasynyń atynan arnaıy kelip, saparyńa sáttilik tilep otyrmyz. Toqtar Áýbákirov, Talǵat Musabaev sekildi aldyńǵy tolqyn aǵalaryńnyń jolyn jalǵap, eliń men ultyńnyń abyroıyn kótergeli otyrsyń. Maqsat-muratyń ońynan oryndalsyn. Bıyl – Qazaqstan úshin óte mereıli jyl.
Qazaq handyǵynyń qurylǵanyna – 550, Qazaqstan halqy Assambleıasyna – 20, elimizdiń eń úlken qujaty – Ata Zańymyzdyń qabyldanǵanyna 20 jyl tolyp otyr. Osyndaı mereıli shaqta seniń kók júzine attanýyń el abyroıyn taǵy bir asyryp otyr.
Ǵaryshkerlerge aq jol tilegen Premer-mınıstrdiń orynbasary qandasymyz Aıdyn Aıymbetovke elimizdiń kók baıraǵy men Qazaqstan halqy Assambleıasynyń jáne EKSPO-2017 kórmesiniń týyn da tabys etti. Endi Aıdyn osy rámizderdi ǵaryshqa ózimen birge alyp ketpek. Sonymen qatar, Qazaq handyǵynyń qurylǵanyna 550 jyl tolýyna oraı arnaıy merekelik medal shyǵarylǵan edi. Elbasynyń arnaıy Jarlyǵymen ekıpaj músheleri atalǵan medalmen marapattaldy.
Bul Sergeı Volkovtyń ǵaryshqa úshinshi sapary. Degenmen buǵan deıin dál mundaı qamqorlyqty sezinbegenin aıtady. Oǵan Aıdyn Aıymbetovtiń aspanǵa ushqaly jatqany sebep ekenin de jetkizdi. "Jerlesterińizdiń ǵaryshqa saparyn Qazaqstan halqy men basshylyǵy qalaı jyly qabyldap, qýanyp jatqanyn sezinip otyrmyz",– dedi ol. Budan keıin sóz alǵan Toqtar Áýbákirov pen Talǵat Musabaev ekıpaj múshelerine sáttilik tilep, oıǵa alǵan josparlarynyń oryndalyp, jerge belgilengen merzimde qaıtyp kelýlerine tilektes ekenderin aıtty. Qyzylorda oblysynyń ákimi Qyrymbek Kósherbaev qasıetti Syr topyraǵy ekıpaj múshelerin aman-saý kútip alatynyn málim etti.
– Sizder ǵarysh álemin taǵy bir márte baǵyndyrýǵa attanǵaly otyrsyzdar. Munyń úlken erlik tutas halyq bilip otyr. Tipti, álginde bilim kúnine oraı ótken jınalysta bir mektep oqýshysy janyma kelip: "Aıdyn aǵaǵa aman-esen baryp kelsin, sapary ońynan bolsyn dep aıtyńyzshy", dedi. Mine, búkil el ózińniń tileýińdi tilep otyr. Sáttilik serigiń bolsyn, – dedi Qyrymbek Eleýuly.
О́z kezeginde Aıdyn Aıymbetov el men Elbasynyń senimin tolyq aqtaıtynyn, moınyna júktelip otyrǵan jaýapkershilik údesinen shyǵatynyn málimdedi. Qazaqstannyń ǵarysh álemin zertteýde alda aýqymdy sharalar atqaratynyna senimdi ekenin aıtty.
Erjan BAITILES,
«Egemen Qazaqstan».
BAIQOŃYR.