Úleskerlerge qatysty turǵyn úı máselesi búgingi tańda elimizdegi kúrmeýi qıyn problemalardyń biri bolyp otyrǵany belgili. Munyń salmaǵy, ásirese, Astana men Almaty qalalaryndaǵy turǵyn úı qurylysy nysandarynda basym bolyp otyrǵandyǵy jasyryn emes. Alaıda Úkimettiń úleskerler múddesin qorǵaý saıasatynyń arqasynda bul máseleler de barynsha sheshilýge qadam basyp keledi. Keshe elordada qurylys jáne turǵyn úı-kommýnaldyq sharýashylyq isteri agenttiginiń departament dırektory Kenjebolat Myńbaevtyń BAQ ókilderimen ótkizgen brıfıngte úleskerler máselesin sheshý jóninde áńgime órbidi.
– 2007 jyldyń sońynda elimizde 62 myńnan astam úlesker bolsa, qazirgi kúni Úkimettiń kómegi arqasynda olardyń 45 myńnan astamynyń máseleleri tolyǵymen sheshilgen. Jalpy, sany úleskerlerge qatysty 450 qurylys nysany bolsa, búginde sonyń 97-siniń máselesin sheshý qalyp otyr. Sonyń ishinde Astanada 42 nysan (8774 úlesker), Almatyda 27 nysan (7704 úlesker) bolsa, elimizdiń ózge aımaqtarynda sheshimin tabýy tıis 28 nysan (5534 úlesker) bar. Bıýdjetten bólingen 215,782 mlrd. teńgeniń 75 paıyzy ıgerilse, bul úleskerler máselelerin sheshýdegi jumystardyń jemisti nátıjesi dep aıtýǵa bolady. Al qalǵan qarjy osy maqsatta úleskerler ıgiligi úshin ári qaraı jumsala bermek, – dedi departament dırektory.
Ábdirahman QYDYRBEK.