Endigi qarsylas – Oman quramasy

Búgin fýtboldan Qazaqstan quramasy Astanadaǵy “Astana-arena” jabyq stadıonynda Oman dáýletiniń qurama komandasyn qabyldaıdy. Joldastyq kezdesý mártebesimen ótetin bul oıyn eli­miz tańdaýly jasaǵynyń qyrkúıek aıynda Eýropa chempıonatynyń birinshi irikteý matchynda Túrkııa quramasymen ótkizetin shaıqasy aldyndaǵy basty synaǵy bolmaq. Jankúıer qaýym respýblıka fýtbol federasııasynyń osynyń aldynda joldastyq kezdesýdi Ek­vador quramasymen ótkizýge kelisim jasasqanyn jaqsy biledi. Biraq, jeme-jemge kelgende, bul eldiń fýtbol tizginin ustap otyr­ǵan bas­shylary jer shalǵaılyǵyn jeleý etip, bul oıyndy ótkizýden bas tart­ty. Sol kezde Oman eliniń jaı­sańdary járdemge kelip, tuıyqtan shyǵýdyń týra jolyn taýyp berdi. Álbette, Oman fýtbolyn Oń­tús­tik Amerıkanyń aıaqdop she­ber­leri qazanynda qaınap júrgen Ekvadordaǵy deńgeıden kúshti edi dep aıta almaımyz. Biraq álemdik reıtıngide Qazaqstannan edáýir joǵary tur. Dál qazirgi tańda ol 81-shi shepte. Al Azııada 8-shi bolyp sanalady. Soǵan qaramastan, Arab túbegindegi shaǵyn eldiń fýtbolmen aınalysqany da qyzyq. Bul mem­lekette fýtbol federasııasy sonaý 1930 jyly qurylypty. Sol jyly FIFA-ǵa múshe bolyp enedi. Sodan 1965 jylǵa deıin birde-bir syrt jurttyń úzdik komandasymen kezdesý ótkizbepti. Tipti 1982 jylǵa deıin álem chempıonatynyń irikteý jarystaryna qatyspaǵan. Al bi­rin­shi oıynyn 1965 jylǵy 2 qyr­kúı­ek­te Maskat sultanatynyń jigit­te­rimen ótkizip, 15:0 esebimen tas-tal­qan etedi. 1986 jyly FIFA-dan shyǵyp ketip, 1990 jyly qaıta ora­­lady. Alaıda, sodan keıin ózi qatysqan irikteý týrnır­le­ri­nen ilgeri shyǵyp kórmegen. Onyń Azııa konfederasııasyndaǵy jaǵ­daıy da osyndaı ala-qula, birde chem­pıo­nattyń ilki oıyndaryna qatyspaı qoısa, qatysqan kezde­rin­de toptan alǵa jyljı almaǵan. Búgin Oman quramasyndaǵy eń tanymal oıynshy retinde qaqpashy Alı Al-Habsıdiń aty atalady. Sebebi, ol Anglııanyń premer-lıgasyndaǵy “Ýıgan” komanda­synda oınaıdy. Quramany fransýz mamany Klod Le Rýa bas­qarady. Ol buǵan deıin Gana, Kon­go jáne Kamerýn quramalaryn jat­tyq­tyryp, sońǵysyna 1988 jy­ly Af­rıka kýbogyn alyp bergen eken. Bul matchqa maýsym-shilde aı­la­rynda Ońtústik Afrıka Respýblı­ka­synda ótken álem chempıonatyn­da qazylyq jasap, ózin óte jaqsy jaǵynan kórsetken ózbekstandyq Ravshan Irmatov tóreshilik etedi. Ol 2008 jáne 2009 jyldary Azııa­nyń eń úzdik tóreshisi atanǵan. Sonymen, búgin bizdiń fýtbol­shylar úshin jaýapty match. Jol­dastyq kezdesý bolǵanymen, sal­ma­ǵy joǵary. Sebebi, ol quramanyń syndarly synaq aldyndaǵy naqtyly daıyndyǵyn kórsetedi. Serik PIRNAZAR.