Álem ótken aptada

Ýkraına prezıdenti Vıktor Iаnýkovıchtiń aıtýynsha, ózderi Eýroodaqqa assosıasııalyq múshe bolyp kirýge jaqyn. Buryn- sońdy dál osyndaı jaqyn bolyp kórmepti. Prezıdent elde qalyp­ta­syp otyrǵan jalpy turaqty­lyq­ty, saıası júıeniń ornyqty­lyǵyn, ekonomıkanyń qarqyndy damýyn  alǵa tosa otyryp, Eýro­odaqqa kirigýdiń alǵysharttary jasalǵanyn málimdedi. Sirá, sol eýropalyq qurylymmen áńgime de júrgizilgenge uqsaıdy. Áıtpese bulaı málimdemes edi ǵoı.

Býrdjanadze – Úmitker

Grýzııanyń burynǵy parla­ment spıkeri Nıno Býrdjanadze el prezıdenti qyzmeti úshin kúreske qosylatyny jóninde má­limdeme jasady. Kezinde qazirgi prezıdent Mıhaıl Saakashvı­lıdiń bılikke kelýine atsalysqan ol endi qazirgi bılikke basty op­po­nent bolyp otyr. Onyń osy­naý kúreste múmkindigi qandaı de­gende, Býrdjanadzeniń Máskeý­men jaqyndasý saıasaty ony qol­daýshylar sanyn kóbeıtedi deý qıyn. Jurt osydan eki jyl bu­ryn­ǵy soǵysty umyta qoıǵan joq. Biraz adam onyń Reseı bas­shy­la­rymen kezdesýin de quptamaǵan.

Eki jylǵa qam qyl

Tájikstan prezıdenti Emo­ma­lı Rahmon halyqqa úndeý tastap, eki jylǵa jetetin azyq-túlik qoryn jasaýǵa shaqyrdy. Muny ol bıylǵy qurǵaqshylyqqa, soǵan baılanysty bolatyn qymbatshy­lyqqa oraı jasady. Qor jasaǵan jaqsy-aý, biraq joqtan qalaı ja­saıdy? Bul elde bir jylǵa qa­jet­t­isi 1,4 mıllıon tonna astyq bolsa, ózderiniń óndiretini – 1 mıllıon ǵana. Syrttan satyp alýǵa májbúr. Al úkimettiń de, halyqtyń da qarjysy tapshy.

Til – túsinistik kópiri

Izraıl úkimetiniń sheshimi boıynsha eldiń memlekettik mektepterinde arab tilin oqytý mindetke aınaldy jáne mektep bitirgende oqýshylar bul pánnen emtıhan tapsyrady. Taǵy bir atap aıtarlyq jaı – bul elde arab tili ekinshi resmı tildiń biri s­a­nalady. Sarapshylardyń piki­rinshe, bir-biriniń tilin bilý adamdardy jaqyndastyrady. Arab tilinen sabaq beretinderdiń kópshiligi evreıler kórinedi.

Karter – arashashy

Soltústik Koreıa úkimetimen til tabysý qıyn ekendigi álem jurtshylyǵyna belgili. О́zderiniń ońtústik jaqtaǵy qandas baýyr­larymen dúrdarazdyǵy óz aldyna, álemniń jetekshi elderimen de kelissóz júrgizýge kelispeı qyr­sy­ǵyp jatady. Sondyqtan da, son­daı eldiń basshylyǵymen AQSh-tyń 39-shy prezıdenti 85 jastaǵy Djımmı Karterdiń til tabysyp, óz eliniń 8 jylǵa kesi­lip, túrmede jatqan azamaty 31 jastaǵy Aıholan Malı Gomesti alyp qaıtqany talaı adamdy tańdandyrdy. Sirá, oǵan halyq­aralyq shıelenisterdi beıbit jol­men sheshýge qosqan úlesi úshin Nobel syılyǵynyń berilgeni de jaıdan-jaı emes-aý deısiń.

Kastronyń sózi kóbeıdi

Kýbanyń kósemi, burynǵy Memlekettik keńestiń tóraǵasy Fıdel Kastro jaqynda telear­nadan sóz sóılep, álemdegi №1 lań­kes sanalatyn Ýsama ben La­dendi AQSh Ortalyq barlaý bas­qarmasynyń (OBB) agenti dep málimdedi. AQSh-ty da, onyń OBB-syn da synaýǵa da, mineýge de bolar, biraq joǵarydaǵydaı málimdeme jasaý ózin syılaıtyn qaıratkerge jaraspaıdy-aq.

Qashqyndar ustalmaı tur

Tájikstannyń Ulttyq qaýip­sizdik komıtetiniń eń myqty de­gen qamaǵynan 25 asa qaýipti qyl­mysker qashyp ketkenin árkim ártúrli áńgime etip jatyr. Bi­reý­ler eldiń quqyq qorǵaý oryn­da­rynyń álsizdigi dese, ekinshileri qashqyndardyń jankeshtiligi deıdi. Olardy eldiń Joǵarǵy so­ty qashyp keterden bir-aq kún buryn 10 jyldan bastap, ómirlik túr­me­ge jabý jazasyna kesken eken. Olarǵa memlekettik tóńkeris ja­saý áreketi úshin aıyp taǵylǵan. Jedel sharalar belgilengenimen, qashqyndar áli qolǵa túspegen.

Ázirlegen Mamadııar JAQYP.