QARAǴANDY. 5 qańtar. Qaraǵandy oblysynda bes kún boıy qar astynda jatqan teplovoz arshyp alyndy. Bul týraly Qaraǵandy jol bólimshesiniń málimetine silteme jasaǵan egemen.kz tilshisi habarlady.
Oqıǵa Qaraǵandy jol bólimshesiniń Ýglerýdnaıa-Tegisjol aralyǵynda oryn alǵan. Kúshti boran men tolassyz jaýǵan qardyń saldarynan júk poıyzy júre almaı, omby qardyń astynda qalǵan bolatyn. Temirjolshylardyń uıymdasqan is-áreketiniń arqasynda teplovoz qar astynan arshyp alyndy. Jalpy joldyń bul ýchaskesi «ArselorMıttal Temirtaý» metallýrgııalyq kombınatyna qyzmet kórsetedi.
Jolda qalǵan lokomotıv Astana-Almaty baǵytyna qatynaıtyn jolaýshylar tasymaldaıtyn poıyzdardyń qozǵalysyna kedergi keltirgen joq. Sondaı-aq, metallýrgııalyq kombınat ta qandaı da bir zııan shekpeı, oǵan qajetti shıkizat Jańa aýyl stansasy arqyly jetkizilip otyrdy.
Qaırat Ábildınov.
Derek, sýret: egemen.kz.