KО́KShETAÝ. 18 qańtar. Aqmola oblysynyń Aqkól aýdanynda óńir basshysy Sergeı Kýlagınniń qatysýymen 140 oryndyq «Aqbota» balalar baqshasynyń saltanatty ashylý rásimi ótti. Bul týraly egemen.kz tilshisi habarlady.
Nysan «Balapan» memlekettik baǵdarlamasy boıynsha qaıta jóndeýden ótkennen keıin paıdalanýǵa berilip otyr. Jalpy bul ǵımarat buryn Aqkól balalar úıiniń mektepke deıingi korpýsy bolyp kelgen. Endi, qaıta uıymdastyrýǵa baılanysty, osy jerde tárbıelenip jatqan 30 bala ǵımarattan Aqkól balalar úıiniń negizgi korpýsyna aýystyryldy.
Aýdandyq bilim bóliminiń qaramaǵyndaǵy «Aqbotada» búldirshinder memlekettik jáne resmı tilderde bilim alýdy bastap ketti.
«Jaraısyńdar, tapsyrmany ýaqytyly ári sapaly oryndadyńdar. Turǵyndar úshin balalar baqshasynyń ashylýy qashanda úlken qýanysh. Men sizderdiń jumystaryńyzǵa sáttilik tileımin», degen oblys ákimi bazarlyq retinde jańa baqshaǵa «Sony Bravia» teledıdaryn syıǵa tartty.
Baqbergen Amalbek.
Derek, sýret: egemen.kz