Ýaqyt kóshine ilespeýi qalaı?

Batyrlardyń batyry Baýyrjan Momyshuly – Baýkeń aıtpaqshy, «súıek-etten jaralǵan adam» bolǵa­syn bas aýyryp, baltyr syzdamaı turmaıdy-aq. Jaqynda osyndaı pánáıi sebeppen Astananyń №8 emhanasyna bara qaldyq. Jamaǵatymyz dárigerler naýqastardy qabyldaıtyn kabınetter aldyndaǵy ubaq-shubaq kezekke murnyn tyǵa almaı, mazalanyp áýre-sarsańǵa túsip jatqanda biz bul kórinisti uzaq qarap turýǵa júregimiz shydamaıtynyn, sabyr-dátimiz jetpeıtinin ańǵaryp shetteı ber­genbiz. Sodan bos turǵansha dep qabyr­ǵaǵa ilingen kórnekilikterge kóz jú­girtkenimiz sol edi, bul arada da kóńilimiz sý sepkendeı basylyp qaldy. «Nege» deısiz ǵoı? О́te oryndy suraq. Aıtaıyq. Syrttaı qaraǵanda ádemi kórinetin stendke túrli plakat, jarnama, emdelýshilerge arnalǵan aqyl-keńester ilinipti. Eń basyna Elbasy Nursultan Nazarbaevtyń bir aýyz sózi keltirilipti. Qazaq já­ne orys tilderinde. Qosh delik. Stend taqyrybyna: «Salaýatty ómir saltyn qalyptastyrý» dep ja­zy­lypty. «Salaýatty» degen sóz­diń qate jazylǵany óz aldyna. Ol «Salamatty» bolýy kerek edi ǵoı. «Zdorovyı obraz jıznı» dege­nimiz qazaq tilinde «Salamatty ómir salty» dep alynyp kele jatqaly qashan. Odan qala berdi, sonda 8-shi em­hana­daǵy abzal jandar «Salamatty Qazaq­stan» baǵdarlamasynan da beıhabar bolǵany ma? Odan ári Elbasy sózinen kelti­rilgen sóılemde taǵy árip qatesi júr. Ony ejiktep jatpaı-aq qoıa­lyq. Tek bul siltemeniń sońynda «Qazaq­stan-2030» dep kórsetilýine qaıran qaldyq. Oıpyrym-aı, búkil Qazaq eli, mine, tórtinshi jylǵa qadam basty, «Qazaqstan-2050» baǵdarlamasymen jumys istep, qııanǵa qulash sermep jatqanda, 8-shi emhananyń jarandary buǵan selt etpeı, shaban attaı sheginshekteýi qalaı ózi?.. degen qyn­jylysty oı keshtik. Olar nege ýaqytpen birge qadam baspaıdy, jańalyqty nege jatsynady? Osy selqostyq, samarqaýlyq halyqqa dári­gerlik qyzmet kórsetý sapasynyń tómen­deýine de áser etip jatqan joq pa eken? О́ıtkeni, enjarlyqtyń qaı tú­ri bolsyn etekten tartary anyq qoı. Nazar QASYM.