Tańerteńgilik jumysqa kelgen «Túrkistan» saltanat saraıynyń qyzmetkerleri aıran-asyr qalǵan. Byltyr ǵana paıdalanýǵa berilgen, ishi-syrty jumyrtqadaı ǵımarattyń kóp esikteriniń talqany shyǵypty. Edendi ábden lastaǵan, qabyrǵalardy qatty zatpen uryp shurq tesik qylǵan.
Polıseıler kóp uzatpaı kúdiktini ustady. Almaty qalasynyń 21 jasar turǵyny eken. Ýyzdaı jas jigit júıke aýrýymen aýyrady. Ata-anasy bir sebi tıe me dep Shymkentke táýipke qaratqaly ákelgen. Júıke aýrýlary dıspanserinde esepte turatyn jigit túnde qonǵan úıden qashyp shyǵyp, «Túrkistannyń» jertólesin buzyp, ishke engen.
Osy oqıǵaǵa baılanysty oblystyq Mádenıet basqarmasynyń basshysy Kúlııa Aıdarbekovaǵa habarlastyq.
– Jigittiń ata-anasy jaqsy adamdar eken. Keshirim ótinip jatyr. Júıke aýrýymen aýyratyn jigittiń óz áreketine esep bermeıtini túsinikti, – deıdi Kúlııa hanym. – Bul da Allanyń bir synaǵy shyǵar dep óz kúshimizben tazalap, ketken shyǵynnyń ornyn toltyrdyq. Balasynyń aýrýymen basy qatyp, ózi ábiger bolyp júrgen jandarǵa salmaq salmadyq.
Mekeme qyzmetkerleri osylaı adamgershilik jasapty. Al jas jigit aqyl-esiniń durys emestigine baılanysty dárigerlerdiń baqylaýynda bolady.
Baqtııar TAIJAN,
«Egemen Qazaqstan».
ShYMKENT.