ASTANA. 29 qańtar. Iemen astanasy Aden qalasynda joıqyn jarylys bolyp, 8 adam qaza tapty. Taǵy 12 turǵyn túrli dene jaraqattaryn aldy. Bul týraly 24.kz-ke silteme jasaǵan egemen.kz habarlady.
Joıqyn jarylys prezıdent rezıdensııasynyń aldynda boldy. Polıseılerdiń habarlaýynsha, jankeshti jarylǵysh zatty denesine baılap, avtokóligimen rezıdensııaǵa kirmek bolǵan. Alaıda, ol dittegen jerine jete almaı, qurylǵyny qaqpa aldynda iske qosqan.
Keıbir jergilikti telearnalar qastandyqtyń sol ýaqytta ǵımarat ishinde bolǵan Aden qalasynyń gýbernatoryna baǵyttalǵanyn habarlaýda. Al jarylys kezinde prezıdent onda boldy ma, joq pa, ol jaǵy belgisiz. Belgilisi beıbit turǵyndar qaza tapqan.
Qazirgi tańda qastandyq áreketti «Irak pen Levant lańkestik uıymy» óz moıyndaryna aldy. Olardyń habarlaýynsha, jarylystyń saldarynan kúzet qyzmetiniń 10 sarbazy qaza taýyp, 20 adam jaralanǵan.
Talǵat Raıymbek.
Derek, sýret: egemen.kz.