Keshe Qazaqstan Respýblıkasynda Saılaýdy baıqaý jónindegi respýblıkalyq qoǵamdyq komıssııa músheleri (SBRQK) «Nur Otan» partııasynyń saılaýaldy shtabynda bolyp, onyń ókilderimen kezdesti.
Kezdesýge SBRQK tóraǵasy Nurlan Erimbetov pen komıssııa músheleri Jabaıhan Ábdildın, Kamal Burhanov, Amanqul Serikbaev, Tamara Shırmer, «Nur Otan» partııasy Tóraǵasynyń birinshi orynbasary – «Nur Otan» partııasy saılaýaldy shtabynyń jetekshisi Asqar Myrzahmetov, «Nur Otan» partııasynyń hatshylary Farhad Qýanǵanov pen Qanybek Jumashev qatysty.
Kezdesý kezinde elektoraldy naýqannyń barysy talqylanyp, saılaý úderisteriniń ashyqtyǵyn qamtamasyz etý maqsatynda onyń barlyq kezeńderinde SBRQK baıqaýshylarynyń «Nur Otan» partııasynyń saılaýaldy shtabymen ózara is-qımylynyń ádis-tásilderi naqtylandy.
SBRQK tóraǵasy Nurlan Erimbetov Komıssııanyń kóp jylǵy jumys tájirıbesi týraly aıta kelip, qoǵamdyq baıqaý Qazaqstandaǵy saılaýlardyń ajyramas bóligi retinde serpindi damyp kele jatqandyǵyn atap kórsetti:
– Komıssııa bes elektoraldy sıkldy tabysty ótkerdi. Bizdiń baıqaýshylar saılaý naýqanynyń barlyq kezeńderinde baıqaý men júıeli monıtorıngterdi qamtamasyz etip, saılaý kúresine qatysýshylardyń barlyǵy úshin birdeı jaǵdaı jasalýyn, qazaqstandyqtardyń saılaý quqyǵynyń saqtalýyn qadaǵalaıdy, – dep atap ótti N.Erimbetov.
SBRQK múshesi Kamal Burhanov Komıssııa baıqaýshylarynyń qataryna úkimettik emes uıymdar, táýelsiz BAQ-tar ókilderi, qoǵamdyq belsendiler engenin kóldeneń tarta kelip, olardyń saılaýdyń ashyqtyǵyn qamtamasyz etý úshin bar kúsh-jigerin jumsaıtynyna sendirdi.
Asqar Myrzahmetov saılaý naýqanynyń barysynda qoǵamdyq baıqaýdyń mańyzy joǵary ekenin atap ótti:
– «Nur Otan» partııasy, elimizdegi jetekshi saıası kúsh bola otyryp, saılaýshylar men kandıdattardyń konstıtýsııalyq quqyqtary qatań saqtalýy qamtamasyz etiletin ashyq ta móldir demokratııalyq saılaý ótkizýge múddeli. Osy turǵydan kelgende, SBRQK táýelsiz qoǵamdyq uıym retinde mańyzdy mıssııa atqarady, – dedi A.Myrzahmetov.