Qazir daǵdarys týraly sózder kóp aıtylady. Ol bir sýyt álem sekildi jurttyń talabyn keıin qaıtaryp, eńsesin basyp tastaıtyndaı kórinedi. Meniń oıymsha, daǵdarystan bulaı jasqanýdyń keregi joq. Bizdiń eldiń ekonomıkasy álemdik ekonomıkanyń bir bólshegi, sondyqtan dúnıejúzilik qarjy jáne saıası daǵdarystardyń oǵan yqpaly bolǵanymen de, árkim ishki múmkindikterdi barynsha bilimdilikpen paıdalansa, tek damı túsetinimiz anyq. Elbasy Nursultan Nazarbaev óziniń Joldaýlarynda jáne «Ult Jospary – qazaqstandyq armanǵa bastaıtyn jol» atty maqalasynda, «Nur Otan» partııasynyń kezekten tys HVII sezinde sóılegen sózinde damýdyń joldaryn soqyrǵa taıaq ustatqandaı etip, bes ınstıtýttyq reformany júzege asyrýdyń ár naqty qadamyna taldaý jasap berdi. Eń bastysy, is isteımin degenge memleket tarapynan kómek-qoldaý bar. Bul Elbasy aıtqan «100 naqty qadamnyń» júzege asatynyna, bolashaqqa senim uıalata túsedi.
Men Qostanaıdaǵy A.Baıtursynov atyndaǵy memlekettik ýnıversıtetin Aýdıt jáne esep mamandyǵy boıynsha bitirgennen keıin «Qostanaı mıneraldary» aksıonerlik qoǵamyna qyzmetke turdym. Osynda qyzmet isteı júrip, meni jeke bıznesimdi ashsam degen oı mazalaı beretin. Ol aınalamyzdaǵy ekologııanyń saqtalýyna úles qossam degen oıdan óristegen edi. Qazir polıetılennen jasalǵan ydystar óte kóp, ómirimizdi «jaýlap» aldy dese de bolady. О́kinishtisi, bosaǵan polıetılen ydystar men qaltalar aınalany lastap boldy. Ekologııalyq tazalyq álemdik ózekti máselege aınalǵaly qashan. Polıetılen qaldyqtarynan qutylýdyń joly ony óndiriske paıdalaný ekeni az aıtylyp júrgen joq.
Men osy polıetılen ydystardy paıdaǵa qalaı asyrý kerek degen saýalmen Reseıdegi osy maqsatta jumys jasap jatqan áriptesterge de bardym. Zerttedim, ekonomıkalyq shyǵyndaryn eseptedim. Árıne, is bastaý úshin qarjy kerek. Bıznes jobamdy jasap, tıisti oryndarǵa usyndym. Joba boıynsha zamanaýı tehnologııany paıdalana otyryp, men bosaǵan polıetılen ydystar men kádimgi topyraq qospasynan kúndelikti turmysqa, óndiriske, qurylysqa qajetti buıymdar jasap shyǵarýǵa táýekel ettim. Men suraǵan 3 mıllıon teńgemdi grant arqyly utyp aldym. Shynymdy aıtsam, qýanyshymda shek joq. Alǵan qarajattyń barlyǵyn da polımer-qum ónimin shyǵaratyn qurylǵy satyp alýǵa jumsadym. Qazir Jitiqarada meniń bolashaq óndirisimniń ǵımaraty, jabdyqtardy ornalastyrý, qurastyrý satysy júrip jatyr. Biz ústimizdegi jyldyń jaz aılarynan bastap ónim shyǵara bastaıtyn bolamyz. Bizdiń «Ekopolımer» kásipornymyz shyǵaratyn jol jaǵasyna tóseıtin plıtalar, brýschatkalar, dekoratıvti albarlar, shatyrlar, albarlardyń bederleri, kanalızasııa qubyrlaryna arnalǵan qaqpaqtar, taǵy basqa da buıymdar naryqta suranysqa ıe bolaryna senimdimin. Men memleketimniń qoldaýy arqasynda osyndaı jaqsy is bastaýyma múmkindik aldym. Ony damytyp áketý ózime baılanysty.
Qaırat MUQATOV,
«Ekopolımer» jekemenshik kásipornynyń jetekshisi.
Qostanaı oblysy,
Jitiqara qalasy.