Jańaózendi damytý máselesi kún tártibine qoıylǵaly beri, qalanyń syrt kelbeti qalypqa kelip qaldy. Al jumyspen qamtý, turǵyn úı sekildi ishki máselelerdiń oryndalýy jóninde «Nur Otan» partııasy ókilderi baıandady. «Qalanyń tynys-tirshiligin qadaǵalap, tıisti máselelerge atsalysyp, aralasyp otyramyz» degen partııa ókilderiniń aıtýynsha, ótken jyly qalada jalpy aýdany 92 myń sharshy metrden asatyn turǵyn úıler paıdalanýǵa berilgen. Bıyl qalany kórkeıtýge bólinetin 14,2 mlrd teńgeni ıgerý barysynda ortalyq qazandyq kishi jylý energııa ortalyǵyna aýystyrylyp, qaıta jańǵyrtylmaq. Sondaı-aq, 50 oryndy medısınalyq emdeý ortalyǵy salynady.
Turǵyndardyń aryz-shaǵymy men talap-tilegin tyńdaý úshin «Nur Otan» partııasy qala ishine 20-dan astam jáshik ornatypty, oǵan 60-tan astam shaǵym jınalǵan. Turǵyndar tarapynan kóp kóteriletin másele – baspana, jer telimi jáne aýyz sýǵa qatysty eken.
140 myńnan astam halqy bar Jańaózende aýyz sý tapshy. Qazirgi tańda qala halqy qubyr arqyly keletin Túıesý, Saýysqan jerasty sýlary men Volga ózeniniń sýyn paıdalanýda. Bul kózderden sý kelmeı qalǵan jaǵdaıda turǵyndardy sýmen qamtamasyz etý úshin sý jınaıtyn syıymdylyǵy ártúrli kólemdegi 6 rezervýar bar, mamandardyń aıtýynsha, bul jıyntyq sý tek úsh kúnge ǵana jetedi dep eseptelgen. Sý jınaý qory 50 myń adamǵa laıyqtalǵandyqtan qazirgi qala halqy sanynyń ósýi aýyz sý máselesin kún tártibine shyǵaryp otyr. Sondyqtan, Jańaózende qazirgi tańda fransııalyq «Degremon» kompanııasynyń qondyrǵylary ornatylatyn jańa sý tushytý zaýyty qurylysy júrýde. 2014 jyly bastalǵan qurylysta 50 adam jumys jasaýda, bıylǵy jyldyń sońyna taman paıdalanýǵa beriledi dep sanalatyn joba qurylysyna 2 mlrd. 101 myń teńgeni qurap, qazirgi tańda qarajattyń 1 mlrd.-y ıgerilgen. Árqaısysy 10 myń tekshe metr syıymdylyqtaǵy 4 rezervýary bar, táýligine 30 myń tekshe metr aýzy sýyn tushytyp, qoldanystaǵy aýyz sý kólemin eki esege deıin arttyratyn zaýyt iske qosylǵan soń 30 jumys orny ashylady.
– Bul jobanyń áleýmettik mańyzy zor, ıaǵnı bul arqyly Jańaózendegi aýyz sý máselesi sheshimin tabatyn bolady. Biz memleketten qarjy bólinip, qolǵa alynǵan jobalardy qadaǵalap otyramyz. Zaýyt qurylysyna bólingen qarjynyń 70 paıyzy respýblıkalyq bıýdjetten, 30 paıyzy jergilikti bıýdjetten bólindi, qazirgi tańda zaýyt qurylysynyń qarqynyn báseńdetpeýi baqylaýda tur. Jańaózende jyl basynda 3 myńnan astam jumyssyz adam bolǵan edi, olardy áleýmettik qoldaýǵa 345,7 mln. teńge jumsalmaq. Jalpy, keshendi damý baǵdarlamasy aıasynda 46 joba qaralǵan. Olardyń ýaqtyly qoldanysqa berilýi partııanyń qatań nazarynda bolady, –deıdi «Nur Otan» partııasy Jańaózen qalalyq fılıaly partııalyq baqylaý komıssııasynyń tóraǵasy I.Keńesov.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.