Memlekettik bıýdjettiń ár tıynynyń suraýy bolar ýaqyt keldi. Keńqoltyqtaý zamanda memleketten bólingen qyrýar qarajatqa túrli áleýmettik nysandar salǵan merdigerler sapasyna jetkilikti mán bermeı, baýy men shýyna oralyp júretin.
Kúni keshe paıdalanýǵa berilgen ǵımarattyń shatyry jel bir uıytqyp soqqanda tutasymen qarǵadaı qalbalaqtap jerge ushyp túsken. Mektep salǵan merdiger tapsyrys bergen parta kishkentaı bolyp, eresek oqýshylar keptelip otyratyn oqıǵalar da kezdesken.
Endi ondaı keleńsizdikke jol joq. «Nur Otan» partııasy Qazaqstan Respýblıkasynyń Ulttyq qory men bıýdjetten bólingen qarajattyń maqsatty ári tıimdi jumsalýyna monıtorıng jasap, baqylaý isin qolǵa aldy.
Byltyr «Nurly Jol» baǵdarlamasy aıasynda Ońtústik Qazaqstan oblysynda 24 nysannyń qurylysyna 7 439,9 mln.teńge qarjy bólingen. 2015 jylǵy 31 jeltoqsandaǵy málimet boıynsha, óńirdegi 11 nysanda qurylys jumystary aıaqtalyp, 7 409,6 mln.teńge nemese qaralǵan qarajattyń 99,6 paıyzy ıgerilipti. Al qalǵan nysandardyń qurylys jumystary 2016 jylǵa ótken.
Túrkistan qalasynda 280 orynǵa eseptelgen balabaqsha qurylysyna 395,8 mln. teńge qaralyp, nysandy bıylǵy maýsym aıynda el ıgiligine tapsyrý josparlanǵan. Keshe Túrkistan qalasyndaǵy partııa fılıaly janyndaǵy ınfraqurylymdardy damytý komıssııasynyń tóraǵasy Baımahan Súleımenov buqaralyq aqparat quraldary ókilderiniń qatysýymen atalǵan nysannyń qurylys barysy jáne jumysymen tanysý úshin arnaıy reıd uıymdastyrdy.
О́tken jyly balabaqshaǵa bıýdjetten 250 mln. teńge bólinip, merdiger «Bek» seriktestigi bekitilgen keste boıynsha jumysty tııanaqty oryndapty. «Bek» JShS-niń ýchaske basshysy Murat Orynbetov: «Balabaqsha qurylysyn ótken jyldyń maýsym aıynda bastadyq. Qarjylandyrý ýaqtyly bolǵandyqtan, biz ótken jylǵa josparlanǵan jumysty bekitilgen merzimde bitirdik. «Nur Otan» partııasynyń komıssııa músheleri biz atqarǵan jumystyń sapasyn baqylaýda. Nysandaǵy jumystardy osy jyldyń mamyr-maýsym aılarynda tolyqqandy aıaqtaımyz degen oıdamyz», – dedi.
Osyndaıda eske túsedi. 2000 jyldardyń basynda Túrkistannyń «Dostyq» aýylyna qonystanǵan aǵaıyndardyń aryzymen sapasyz salynǵan mektep ǵımaratyn kórýge kelgenbiz. Edeni keppegen taqtaımen jabylǵan. Astynan yza ótken soń, sý taqtaı bordaı úgiledi. Salmaǵy aýyrlaý bir muǵalimi oryndyqqa sylq otyrǵanda tórt temir aıaǵy edendi tesip ketip, úıelep qalǵan ǵoı. Shirigen taqtaıdan edendi ustap turý úshin ár jerden kirpish tireý qoıylǵanyn ózimiz de kórdik. Búginde ondaı sapasyz qurylystar kelmeske ketti.
Aıtqandaı, 280 oryndyq balabaqshany salýǵa jumsalǵan qurylys materıaldarynyń 90 paıyzy otandyq bolsa, sonyń 40 paıyzy Túrkistan kásipkerleriniń úlesine tıdi. Túrkistanda elimiz Táýelsizdik alǵaly 22 jańa mektep, 10-nan astam medısına nysandary salynǵan. Buǵan qosymsha aıtarymyz, Túrkistan qalasy ejelgi órkenıet ortalyǵy retinde IýNESKO-nyń búkilálemge tanymal mádenı-tarıhı keshender men eskertkishter tizimine kirse, Ahmet Iаsaýı kesenesi Jibek jolyn jańǵyrtý baǵdarlamasyna engen.
Maǵjan aqyn «Túrkistan – er Túriktiń besigi ǵoı», dep jyrlaǵan kıeli qalada osyndaı irgeli bastamalar qolǵa alynyp jatyr.
Baqtııar TAIJAN,
«Egemen Qazaqstan».
Ońtústik Qazaqstan oblysy.