Keshe «Aýyl» halyqtyq-demokratııalyq patrıottyq partııasy saılaý naýqanyna daıyndyqtaryn pysyqtaý maqsatynda aımaqtyq fılıaldarymen onlaın-konferensııa ótkizdi.
«Aýyl» partııasynyń respýblıkalyq jáne aımaqtyq shtabtary saılaý naýqanyna daıyndyq jumystaryn kúsheıte tústi. Sonyń bir kórinisi retinde osy onlaın-konferensııanyń uıymdastyrylýyn aıtsaq bolady.
Shara barysynda partııanyń respýblıkalyq qoǵamdyq shtabynyń jetekshisi Rústem Jolaman «Saılaý týraly» Zańnyń negizgi talaptaryn jáne onyń Parlament Májilisi depýtattaryn saılaýǵa qatysty baptaryn elektoraldy naýqan kezinde qandaı da bir zań buzýshylyq oryn almaýy úshin aımaqtyq shtab basshylary men múshelerine túsindirip berdi. Ásirese, ol aldyn ala júrgiziletin úgit-nasıhat jumystaryna qatysty zańnamalyq shekteýlerge, sonymen qatar, úgit-nasıhat kórnekilikterin ornalastyrý, taratý talaptaryna basa nazar aýdardy.
О́z kezeginde «Aýyl» partııasy tóraǵasynyń birinshi orynbasary Tolymbek Ǵabdiláshimov saılaýaldy úgit-nasıhat naýqanyna qatysty uıymnyń daıyndyq barysy týraly sóz etti. Onyń aıtýynsha, saılaýaldy úgit-nasıhat naýqanyna daıyndyq qyzý júrgizilýde. Qazirgi ýaqytta barlyq óńirdiń daıyndyǵy pysyqtalyp, ár oblys ortalyǵynda ashylǵan shtabpen baılanys kúsheıtilgen. Sonymen qatar, ol jergilikti fılıaldar jumysynyń kúndelikti esebi alynyp otyratynyn, árbir óńirlik shtabta azamattardy qabyldap, olardy qyzyqtyrǵan máselelerge jaýap beretin qoǵamdyq qabyldaýlar jumys isteıtinin jetkizdi.
Budan keıin respýblıkalyq shtab basshylyǵy ózderin tolǵandyryp júrgen suraqtaryn qoıǵan aımaqtaǵy fılıaldar ókilderine onlaın baılanys arqyly tıisti jaýaptaryn berdi.
Sonymen birge, onlaın-konferensııada senim bildirilgen adamdardy tirkeý, úgit-nasıhat toptaryn qalyptastyrý jáne basqa da qajetti sharalardy uıymdastyrý týraly aıtyldy.
Joldybaı BAZAR,
«Egemen Qazaqstan».