Burnaǵy kúni buǵan deıin kóktemniń kúıin keshkendeı bolyp turǵan Shymkentke qys qaıta kelgendeı boldy. Qysqa merzim ishinde aımaqty ulpadaı appaq qar basty da qaldy. Bul qoıannyń quıryǵyndaı bulańdaǵan qystyń qaıta úıirilip soqqanyn kórsetti.
Al bıyl jańa jyldy ońtústik óńiriniń jurty jyly jańbyrmen qarsy alǵan. Arqada arqyraǵan boran qarǵa adym jerdi kórgizbeı, aspan men jer kók muzǵa oranyp jatqanda Shymkentte báısheshek búr jarǵan, shıe gúldegen. Esik aldyndaǵy alańqaıymyzda qaýlap ósken balaýsa oraqpen orarǵa kep qalǵandaı edi.
«Aq kıimdi, deneli, aq saqaldy, soqyr, mylqaý tanymas tiri jandy» qysyńyz Shymkent degen jerde de qys bolý kerektigin umytyp ketti me dep júrgenimizde, aqpannyń ekinshi aptasy qarmen bastaldy. Qylamyqtap jaýdy, jerge túspeı erip jatty. Bolmaǵan soń japalaqtap jaýyp, qabaǵyn túksıtip edi, qys tústi.
Túnde bes gradýs, kúndiz úsh-tórt gradýs aıaz bar. Balalar rahattanyp qaldy. Úlkender taýǵa baryp shańǵy teýip júr. Biraq, qoıannyń quıryǵyndaı sholtań ete qalatyn Ońtústik qysynyń aıaǵy osy qar bolatyn syńaıly.
12 aqpannan bastap aýa temperatýrasynyń jylylyǵy 2-3 gradýsqa artady dep kútilýde.
Qys osylaısha syr berip tur.
Baqtııar TAIJAN,
«Egemen Qazaqstan».
Ońtústik Qazaqstan oblysy.