QARAǴANDY. 11 aqpan. Qaraǵandy oblystyq ishki ister departamentiniń basshylyǵy qylmyskerdi ustaýǵa kómektesken Temirtaý qalasynyń turǵynyn marapattaý týraly sheshim qabyldady. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady.
Temirtaý qalasynyń 17 jastaǵy turǵyny 88 jastaǵy zeınetkerdiń páterine tereze arqyly túsip, keıýanany qorqytyp, 70 myń teńgesin alyp ketken. Tonalǵan zeınetkerdiń kórshisi bul bassyzdyqty baıqap qalyp, dereý polısııa bólimshesine habar beripti. Osynyń arqasynda tártip saqshylary kúdiktini izin sýytpaı qolǵa túsirdi.
Qazirgi ýaqytta kúdikti ýaqytsha qamaýda otyr. Sotqa deıingi tergeý amaldary júrgizilýde.
Qaırat Ábildınov.
Derek: Qaraǵandy oblysy ishki ister departamentiniń baspasóz qyzmeti.
Sýret: sovetsk39.ru.