«Atameken» Ulttyq kásipkerler palatasynyń tóralqa tóraǵasy Tımýr Qulybaev pen Almaty qalasynyń ákimi Baýyrjan Baıbektiń qatysýymen Almaty qalasy kásipkerleriniń dástúrli II konferensııasynda bıznestiń júıelik problemalaryn sheshý máseleleri talqylandy.
Otandyq bıznestiń san túrli máselelerin sóz etken bul jıynǵa Ulttyq bank tóraǵasy Danııar Aqyshev, Qarjy mınıstrligi Memlekettik kirister komıtetiniń tóraǵasy Dáýlet Erǵojın, «Atameken» Ulttyq kásipkerler palatasynyń tóraǵasy Abylaı Myrzahmetov, sondaı-aq, «Báıterek» ulttyq holdıngi, qarjy jáne damý ınstıtýttary men Almaty qalasynyń shaǵyn jáne orta bıznes sýbektileriniń basshylary qatysty.
Alqaly keńeste búgingi tańda bıznes áriptestik úshin eń ózekti problemalardyń biri – ekonomıkanyń damý ınfraqurylymyna qosylý jáne qoljetimdilik máseleleri kásipkerler úshin áli de alynbas qamal bop turǵandyǵy aıtyldy. Ulttyq kásipkerler palatasy tóraǵasynyń orynbasary Nurjan Áltaev kásiptik-tehnıkalyq bilim berýdiń damýy men bıznestiń satyp alýdaǵy róli týraly, palata basshysynyń orynbasary Iýlııa Iаkýpbaeva qazirgi naryq jaǵdaıyndaǵy bıznesti jekeshelendirý men zańdastyrý taqyrybynda baıandamalar jasady.
О́z sózinde Almaty qalasy kásipkerler palatasynyń dırektory Iýrıı Tileýmuratov kásipkerlerdiń qalalyq palatasy Almaty qalasy boıynsha únemi bıznestiń júıeli máselelerine saraptama júrgizip otyratyndyǵyn aıta kelip, otandyq bıznestiń aldynda turǵan negizgi kedergilerdi atap kórsetti. Onyń aıtýynsha, osy jylǵy monıtorıng júrgizý barysynda qala boıynsha 3 myńnan astam bıznes sýbektiler qamtylyp, qorytyndysynda 1139 kásiporyndardyń naqty máseleleri anyqtalǵan, kásipkerlik salasynda jıi kezdesetin júıeli máseleler – otandyq óndirýshilerdiń ónimin ótkizý, qarjy resýrstarynyń qoljetimdiligi, satyp alýlar men jergilikti qamtý jumystary, ákimshilik kedergiler, bıznesti qoldaýǵa arnalǵan memlekettik baǵdarlamalardyń qoljetimdiligi, naryq qatynasynda bolyp turatyn ózge de máseleler, salyq júıesinde kezdesetin máseleler dep naqty 7 topqa toptastyrylǵan.
Anyqtalǵan máselelerge oraı Ulttyq kásipkerler palatasynyń osy problemalardy sheshý boıynsha birqatar usynystar ázirlegenin jetkizdi.
Baýyrjan Baıbek Almaty qalasy elimizdegi bıznestiń ortalyǵy jáne otandyq kásipkerlerge qalada meılinshe jaıly jaǵdaı týdyrý kún tártibinen túspeıtin másele ekendigin aıta kele, qazirgi tańda respýblıka boıynsha júrgizilip otyrǵan jekeshelendirýdiń ekinshi legi bıznesti damytýda úlken ról atqaratyndyǵyn da jetkizdi.
Budan ózge atalmysh jıynda Ulttyq kásipkerler palatasy tarapynan basqa da usynystar aıtyldy. Olardyń ishinde shaǵyn jáne orta bıznestiń aınalymdyq qarajatyn qarjylandyrý jáne valıýtalyq qaryzdaryn qaıta qarjylandyrýdy usyný, Ulttyq bankke ekinshi deńgeıli bankterge biryńǵaı mólsherleme boıynsha qysqa merzimdi ótimdilikti júzege asyrý múmkindigin berý, sonymen birge, paıyzdyq mólsherlemeni sýbsıdııalaý, «Bıznestiń jol kartasy-2020» baǵdarlamasy boıynsha bólinetin bıýdjettik qarajat kólemin arttyrý jaǵy usynyldy.
Qanat ESKENDIR,
«Egemen Qazaqstan».
ALMATY.