Shańǵy sportynyń sırek túri – frıstaıl-akrobatıkadan Álem kýbogynyń kúmis júldesin alǵan Janbota Aldabergenova týraly móltek syr
Jaqynda Máskeýde ótken frıstaıldan Álem kýbogynda Janbota Aldabergenova kúmis júldege qol jetkizdi. Ol aqtyq syn qorytyndysynda 75,91 upaı alsa, alań ıesi máskeýlik Alına Grıdneva 77,43 upaı jınaǵan. Qola júlde 75,69 upaıy bar Amerıkanyń úmiti Medıson Olsenge buıyrdy.
Shańǵymen frıstaıl-akrobatıka tarıhynda tuńǵysh ret osyndaı iri jeńiske jetip, sport jylnamasyna esimi qurmetpen jazylǵan Janbota Aldabergenovanyń jeńisti joryǵy kezdeısoqtyq emes. Ol buǵan deıin Sochı Olımpıadasynda úzdik altylyqtyń ishinde boldy. Mınskide ótken Eýropa kýbogy úshin jarystyń eki kezeńinde kósh bastady. Osy qýanyshqa oraı biz Janbota Aldabergenova jattyǵatyn Shymkenttegi №8 Qysqy sport túrleri ORMBJM dırektory Baqytjan Zııabekovke arnaıy jolyqqanbyz.
– Janbota Máskeýde áli biraz ýaqytqa deıin bolady, – dedi Baqytjan Ordabekuly. – Bul jeńis ońtústikqazaqstandyqtardyń ǵana emes, búkil qazaq jurtynyń jeńisi. Janbota – syrt kózge qarapaıym kóringenimen, alǵan maqsatynan qaıtpaıtyn qaısar qyz. «Shyǵystyń qos shynary» atanǵan Álııa men Mánshúkteı ardaqty apalarymyzdyń rýh namysy osy qyzda bar-aý dep oılaımyn. Shańǵyly frıstaıl-akrobatıka óneri – qysqy sport túrleriniń ishinde eń qıyny. О́zderińiz de kórip júrsizder ǵoı, joǵarydan quldılap kelip qaıqańnan sekirgende sportshy bes metr bıiktikke deıin aspanǵa ushyp ketedi. Sonshama bıiktikten aýada aınalyp, jerge nyq túsý sańlaq sportshylardyń ózine jeńildikpen kelmeıdi. Buǵan deıin sporttyq gımnastıkamen aınalysqan Janbotanyń frıstaıl-akrobatıka túrine ótkenine tórt-bes jyl ǵana. Al onyń qarsylastarynyń ómirbaıanyna úńilseń, sporttyq ótili on, on bes jyl.
Jalpy, sporttyń bul túrinde Janbota jalǵyz emes. M.Aqjigit, B.Inkárbek degen sportshylarymyz Mınskide ótken Eýropa kýbogy kezeńinde tórttikke kirdi. Konkımen mánerlep syrǵanaý, short-trek, shaıbaly hokkeı jáne ámbebap jekpe-jek bólimi sportshylary respýblıkalyq, halyqaralyq jarystarda laıyqty júlde alyp júr.
Bir qyzyǵy, Janbotanyń aǵaıyndary qyzynyń qandaı sport túrimen aınalysatynyn Sochıdaǵy qysqy Olımpıada oıyny kezinde bir-aq bilgen eken. Birbetkeı qyz aıtpaı kelgen. Shańǵy arqalaǵanǵa shańǵymen syrǵanap júr dep túsingen ǵoı.
Qazaqtyń qaısar qyzynyń qazir bir ǵana armany bar. Ol – Olımp bıiginiń shyńyna shyǵý.
Baqtııar TAIJAN,
«Egemen Qazaqstan».
Ońtústik Qazaqstan oblysy.