550 saılaý ýchaskesinde saýaldama júrgizedi
Keshe Astanada KTK telearnasy men «Demokratııa ınstıtýty» ǵylymı zertteý qaýymdastyǵy birlesip 20 naýryz kúni ótetin Parlament Májilisi depýtattarynyń saılaýyna baılanysty brıfıng ótkizdi. Onda aldaǵy saıası naýqandy áleýmettik súıemeldeý máselesi sóz boldy.
Atalǵan telearnanyń dırektory Qanat Saharııanov «Demokratııa ınstıtýty» saılaý kúni daýys berý ýchaskelerinde saýaldama júrgizetinin aıtyp: «KTK saılaýdy áleýmettik súıemeldeý úshin osy ǵylymı ınstıtýtqa tapsyrys berdi. Bul rette biz senim artyp otyrǵan uıymnyń exit-poll tehnologııasy boıynsha jumys isteıtinin erekshe atap ótken jón», – dedi.
О́z kezeginde «Demokratııa ınstıtýty» ǴZQ dırektory Iýlııa Kýchınskaıa saýaldama kezinde elimizdiń barlyq aımaǵy men Astana jáne Almaty qalalaryndaǵy 550 saılaý ýchaskesi qamtylatynyn jetkizdi. Bul jóninde ol:
«Bizdiń ınstıtýttyń ókilderi saılaý kezinde qalalyq jerlerdegi – 313, al aýyldyq eldi mekenderdegi 237 daýys berý ýchaskesinde jumys isteıdi. Ár ýchaskede keýdelerinde arnaıy beıdjderi bar 2 qyzmetkerimizden turady. Olardyń barlyǵy exit-poll-dyń shyǵaberiste kimge daýys bergendigi jóninde saýaldama júrgizý tehnologııasyn meńgergen. Zertteý barysynda daýys berýshiniń jasy, geografııalyq ereksheligi sekildi barlyq faktorlar eskeriledi. Biz qoldanatyn ádisti sheteldik jáne otandyq ǵalymdar maquldaǵan. Osyǵan deıin Qazaqstanda ótken úsh saılaý naýqanynda jumys istedik. Qorytyndymyz Ortalyq saılaý komıssııasynyń esebimen birdeı boldy. Aıyrmashylyq shamamen 0,5 paıyz mólsherinde ǵana», – dedi.
Iý.Kýchınskaıanyń sózine qaraǵanda, saýaldama júrgiziletin saılaý ýchaskeleri ár aımaqtaǵy saılaýshylardyń sanyna baılanysty bólinedi. Olardyń tizimderi stratıfıkattalǵan iriktemeni qurý tehnıkasyn oryndaý arqyly jasalady. Sonyń arqasynda oblys ortalyqtarynan shalǵaıda ornalasqan jáne damý deńgeıi ártúrli eldi mekender qamtylmaq.
Sonymen qatar, ınstıtýt dırektory saılaý kúni málimetterdi jınaý bes ýaqyt aralyǵynda jeke áleýmettik-demografııalyq toptardyń elektoratty belsendiligin esepke ala otyryp iske asatynyn málimdedi. «Bul tásil halyqtyń túrli toptaryn qamtýǵa múmkindik beredi», – dedi Iý.Kýchınskaıa.
«Qoldanylatyn saýaldama ádisteri reprezentatıvti, senimdi málimetter alýǵa jáne yqtımal aýytqýlardyń úlesin eseptep shyǵarý arqyly boljamdyq baǵa berýge tıimdi. Taǵy bir aıta ketetin jaıt, naýqan kezinde bizdiń ınstıtýt elimizde saılaýdy uıymdastyrý jáne ótkizý aspektileri boıynsha da ekspress-saýaldamalar júrgizedi. Sondaı-aq, bilikti sarapshylardyń pikirleri de nazarǵa alynady», – degen ol ádettegideı, exit-poll-dyń zertteý nátıjesi 20 naýryz kúni saılaý aıaqtalǵannan keıin ǵana jarııalanatynyn aıtty.
Elaman QOŃYR,
«Egemen Qazaqstan».