ALMATY. 22 aqpan. Almaty qalasyndaǵy Nazarbaev zııatkerlik mektebinde 23 aqpan kúni Audiokitap mobıldi qosymshasynyń saltanatty tanystyrylymy ótedi. Bul týraly egemen.kz tilshisi habarlady.
Mobıldi qosymshany WikiBilim qoǵamdyq qory «Shevron» kompanııasynyń qoldaý kórsetýimen jasap shyǵardy. Jobanyń negizgi ıdeıasy – kitaptardy mobıldi qurylǵylar arqyly aýdıoformatta qoljetimdi etýge baǵyttalǵan, maqsaty – ulttyq ádebıet, ǵylym, mádenıetke qatysty týyndylardy jınaqtaý jáne avtorlyq quqyqty saqtaı otyryp kópshilik arasynda taratý.
Joba WikiBilim qoǵamdyq qorynyń damytyp jatqan «Qazaqstannyń ashyq kitaphanasy» atty onlaın joba negizinde júzege asyrylyp otyr.
Qazirgi tańda kitap.kz – Qazaqstannyń ashyq kitaphanasy qazaq mádenıetine qatysty týyndylardyń eń tolyq elektrondyq toptamasyn, sondaı-aq, álemdik kórkem jáne ǵylymı-kópshilik ádebıet týyndylarynyń qazaq tilindegi aýdarmalaryn usynyp otyr.
«Qazaqstannyń ashyq kitaphanasynda» 500-den asa avtordyń 4000-nan asa kitaby, 130 avtordyń 1500-den asa aýdıokitaby jınaqtalǵan. Jobaǵa Ilııas Jansúgirov, Sáken Seıfýllın, Muhtar Áýezov, Ǵabıden Mustafın, Qasym Amanjolov, Baýyrjan Momyshuly, Zeıin Shashkın, Juban Moldaǵalıev, Qalıjan Bekhojın, Saǵı Jıenbaev, Ǵafý Qaıyrbekov, Safýan Shaımerdenov, Zeınolla Qabdolov, Qaltaı Muhamedjanov, Sáken Júnisov, Ábish Kekilbaev sekildi avtorlardyń kitaptary endi. Sonymen qatar, Muhtar Shahanov, Sofy Smataev, Qabdesh Jumadilov, Sherhan Murtaza, Tólen Ábdikov, Dýlat Isabekov syndy qalamgerlerimiz de óz týyndylaryn jarııa etýge kelisimin berdi.
Audiokitap mobıldi qosymshasy «Qazaqstannyń Ashyq kitaphanasyndaǵy» barlyq aýdıokitapty tegin tyńdaýǵa múmkindik beredi. Qosymshany tek onlaın ǵana emes, sondaı-aq, aýdıokitaptardy qosymshadaǵy jeke kitaphanaǵa júkteý arqyly offlaında da tyńdaýǵa bolady. Audiokitap smartfondardyń eń tanymal Android jáne iOS júıelerine beıimdelip, qoljetimdi bolyp otyr.
Aınash Esalı.
Derek, sýret: egemen.kz.