ASTANA. 22 aqpan. Astanadaǵy Qazaqstan Respýblıkasynyń Ulttyq murajaıynda qazaqtan shyqqan tuńǵysh ǵaryshker, ushqysh, Keńes Odaǵynyń Batyry, Halyq qaharmany, tehnıka ǵylymdarynyń doktory, professor Toqtar Ońǵarbaıuly Áýbákirovpen kezdesý ótti. Bul týraly Ulttyq murajaıdyń aqparattyq ımıdjdik qyzmetine silteme jasaǵan egemen.kz tilshisi habarlady.
«Bul kún bizdiń Ulttyq mýzeı tarıhyndaǵy eń aıtýly oqıǵalardyń biri bolyp tarıhta qalaryna senimdimin. Búgingi kezdesýdiń basty maqsaty – qazaqtan shyqqan tuńǵysh ǵaryshkermen syrlasyp, otandyq ǵarysh salasynyń ótkeni men bolashaǵy jaıly áńgimelesý bolyp otyr. Biz patrıotızm degendi jıi aıtamyz. Al shyn máninde sózimen jáne isimen, búkil jan dúnıesimen patrıottyqtyń úlgisi dep osy Toqtar Áýbákirovti ataýǵa bolady. Biz bolashaqta ǵarysh álemine baılanysty Ulttyq murajaıdan arnaıy zal ashsaq dep otyrmyz. Sol zaldyń qurylymy, jáne bolashaq jumysy jaıynda da ǵaryshkermen aqyldasyp otyratyn bolamyz», – dedi jıynda sóz alǵan Ulttyq mýzeı dırektory Darhan Myńbaı.
«Bıyl ǵaryshqa kóterilgenime 25 jyl tolady. Osynaý jaýapty mıssııadan súrinbeı ótýime eń basty sebep – qazaq halqynyń maǵan degen kirshiksiz qurmeti men selkeýsiz senimi. Men halqym úshin ushtym jáne sol úshin de úlken qurmetke bólendim. Qaı jerge barsam da «Bizdiń batyrymyz keldi», «tuńǵysh ǵaryshkerimiz keldi» dep qarsy alady. Sol jurttyń rııasyz kóńiline dán rızamyn. Men qazaqtyń ulan-ǵaıyr dalasyn ǵaryshtan kórip, qadirin ábden uǵynǵan adamnyń birimin. Sondyqtan jastarmen kezdese qalǵan jerde Otanymyzǵa degen qurmet, adaldyq taqyryptarynda kóbirek suhbat júrgizgendi unatamyn. Meniń aldymda eki bala otyrsa da sóıleı berýge daıynmyn. Bastysy ol ekeýiniń Qazaqstanǵa degen mahabbatyn, ata-babalarymyzdan qalǵan jerge degen qurmetin arttyra bilsem, ýaqytymnyń bos ketpegeni. Jas kezimde mektep kitaphanasynan shyqpaıtynmyn. Sondaǵy bar kitapty oqyp taýystym. Dese de kóp dúnıege qol jete bermeıdi. Al, qazir bári bar, kim qandaı kitap oqımyn dese, qaıda oqımyn dese, kóp múmkindikterdi paıdalanýǵa bolady. Jalpy adam balasy bilim alýǵa eshqashan sharshamaýy kerek. Ol kishige de, úlkenge de kerek», – dedi T.Áýbákirov.
Is-sharaǵa Qazaqstan Respýblıkasynyń Ulttyq mýzeıiniń ǵylymı qyzmetkerleri, ýnıversıtet stýdentteri qatysty.
Aıan Ábdýálı.
Derek, sýret: egemen.kz