QARAǴANDY. 26 aqpan. Qaraǵandy oblysynda 81 jastaǵy qart adamdy soqqyǵa jyǵyp, aqshasyn tartyp áketken tórt kúdiktini polısııa qyzmetkerleri qolǵa túsirdi. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady.
Jas shamalary 25 pen 30-dyń aralyǵyndaǵy tórt kúdikti Novodolınka poselkesinde turatyn zeınetkerdiń páterine baryp, ony uryp-soqqan. Sonan keıin qarııanyń 22 myń teńgesin tartyp alyp, ózin avtokólikke salyp aıdalaǵa aparyp tastaǵan.
Shyǵar-shyqpas jany bar zeınetkerdi aýyldastary taýyp alypty. Basy jarylyp, buǵanasy synǵan qarııa qazirgi ýaqytta Shahtınskidegi qalalyq aýrýhanada em qabyldap jatyr.
Al polısııa qyzmetkerleri bolsa, osy qylmysqa qatysy bar kúdiktilerdi ustap, qamaýǵa aldy. Qazirgi tańda sotqa deıingi tergeý amaldary júrgizilip jatyr.
Qaırat Ábildınov.
Derek: Qaraǵandy oblystyq ishki ister departamentiniń baspasóz qyzmeti.
Sýret: liter.kz.