TARAZ. 26 aqpan. Tarazda joǵalyp ketken alty jasar balany Ulttyq ulan sarbazdary taýyp berdi. Bul týraly «Ońtústik» óńirlik qolbasshylyǵynyń baspasóz qyzmetine silteme jasaǵan egemen.kz tilshisi habarlady.
Atalǵan qyzmettiń ókili Aıdos Baıshaǵyrovtyń aıtýynsha, 23 aqpan kúni saǵat 19:05-te Taraz qalasyndaǵy qoǵamdyq tártip pen qaýipsizdikti qamtamasyz etý boıynsha qyzmet atqarý barysynda Ulttyq ulannyń áskerı jasaǵyna sol qalanyń turǵyny, azamatsha Araılym О́mirálıevadan 6 jasar uly Qalmahan Beknurdyń úıden shyǵyp, joǵalyp ketkendigi týraly habar túsken. Balasyn taýyp berýdi ótingen anasynyń aıtýy boıynsha uly Beknur sol kúni saǵat 12:30 shamasynda kompıýter klýbyna oınaýǵa ketip, qaıta oralmaǵan. Anasy óz kúshimen ulyn izdep taba almaǵan soń sarbazdardan kómek suraýǵa májbúr bolǵan.
«Joǵalǵan bala týraly málimet alǵan soń Ulttyq ulannyń áskerı jasaq quramy, áskerı jasaq patrýliniń bastyǵy qatardaǵy Azamat Asylbek, patrýlder qatardaǵy Aıdos Dáýletqulov pen Taıyr Ibragımov jáne kınolog serjant Erbolat Asanov «Rada» laqap atty qyzmettik ıtti qoldaný arqyly dereý balany izdeýge kiristi. Balany izdeý barysynda kompıýterlik klýbtyń mańynan «Rada» laqap atty qyzmettik ıt joǵalǵan balanyń izin kesedi, sol arqyly áskerı jasaq izge túsip aımaqty tintýge kiristi», – dedi Aıdos Baıshaǵyrov.
Osydan keıin 20 mınýt ýaqyt boıy iz kesken áskerı jasaq quramy 1500 metr aýmaqty tintip shyǵyp, aqyry joǵalǵan balany qalalyq mádenıet úıiniń mańynan taýyp alady jáne ony saryla kútip otyrǵan anasyna aman-esen jetkizedi. Balanyń aıtýy boıynsha, ol oınap júrip ýaqyttyń kesh bolyp ketkenin bilmeı qalady jáne anasynyń ony izdep júrgenin sezbegen.
«О́zderiniń qyzmettik is-áreketterine dereý kirisip, jedel is-qımyldarynyń arqasynda ýaqyt ozdyrmaı ulyn taýyp bergen Ulttyq ulannyń áskerı jasaq quramyna joǵalǵan 6 jastaǵy Beknurdyń anasy sheksiz alǵysyn bildirdi», – dedi «Ońtústik» óńirlik qolbasshylyǵy baspasóz qyzmetiniń ókili.
Oralhan Dáýit.
Derek: egemen.kz.
Sýret: inform.kz.