«Aýyl» halyqtyq-demokratııalyq patrıottyq partııasy respýblıkalyq qoǵamdyq shtabynyń músheleri Astanada Eýropadaǵy qaýipsizdik jáne yntymaqtastyq uıymynyń Demokratııalyq ınstıtýttar men adam quqyqtary jónindegi bıýrosy (EQYU/DIAQB) Parlament Májilisi saılaýyn baıqaý jónindegi mıssııasynyń jetekshisi Borıs Frlespen júzdesti.
EQYU/DIAQB mıssııasynyń saıası máseleler jónindegi sarapshylary jáne «Aýyl» partııasynyń belsendileri qatysqan sharada respýblıkalyq qoǵamdyq shtab jetekshisi Rústem Jolaman sheteldik baıqaýshylardy Parlament Májilisiniń depýtattaryn saılaý naýqanyna daıyndyq barysymen tanystyrdy.
«Qazirgi tańda «Aýyl» partııasynyń respýblıkalyq qoǵamdyq shtaby barlyq qajetti kadrlyq, materıaldyq jáne qarjylyq resýrstarǵa ıe jáne saıası dodaǵa laıyqty deńgeıde qatysýǵa daıyn. Barlyq aımaqtyq shtabtar tolyq jabdyqtalǵan jáne jumysqa qabiletti. Biz aımaqtyq shtab jetekshileri men múshelerin saılaý naýqanynyń búge-shigesimen tanystyryp, olardy oqytýdy jalǵastyryp kelemiz. Ortalyq shtab tarapynan olarǵa barlyq qajetti uıymdastyrýshylyq, ádistemelik jáne aqparattyq qoldaý kórsetilip, tıisti nusqaýlyqtar men kitapshalar, úgit-nasıhat materıaldarymen qamtamasyz etildi», – dedi R.Jolaman.
Sonymen qatar, ol EQYU/DIAQB mıssııasy sarapshylaryna partııanyń saılaýaldy baǵdarlamasynyń basym baǵyttary turǵysynda áńgimelep berdi.
EQYU/DIAQB mıssııasynyń basshysy Borıs Frles óz kezeginde búgingi kezdesýdi uıymdastyrǵan tarapqa alǵysyn bildirip, mıssııa sarapshylarynyń basty jumys baǵyttarymen tanystyryp shyqty. Sonymen birge, kezdesý kezinde saılaý naýqanyna qatysty normatıvtik-quqyqtyq baza, úgit-nasıhat sharalaryn ótkizýdiń qyr-syry talqylandy.
Shara sońynda qoǵamdyq shtab jetekshisi R.Jolaman partııanyń barlyq halyqaralyq baıqaýshylar úshin ashyq jáne aldaǵy saılaý naýqanynyń zań talaptaryna saı ótýine múddeli ekenin jetkizdi.
Taǵy bir aıta keter jaıt, ótken jeksenbide «Aýyl» partııasynyń uıytqy bolýymen О́skemen qalasyndaǵy «Jekpe-jek» saraıynda toǵyzqumalaq, doıby jáne shahmattan jastar arasynda saıys uıymdastyryldy.Sporttyq shara barysynda respýblıkalyq qoǵamdyq shtab ókilderi qatysýshylarǵa partııanyń saılaýaldy baǵdarlamasynyń basym baǵyttaryn túsindirip berdi. Sondaı-aq, jıynda halqymyzdyń dástúrli qundylyqtary men qoǵamnyń rýhanı damýy turǵysynda sóz boldy. Sharaǵa qatysýshylar ulttyq salt-dástúrdi jańǵyrtýdy qolǵa alǵan «Aýyl» partııasynyń qadamyn quptady. Saıys aıaqtalǵan soń, júzden júırik shyqqandarǵa arnaıy dıplomdar tabys etildi.
Joldybaı BAZAR,
«Egemen Qazaqstan».