Qazaqstanda kásiporyn basshylarynyń jalpy sanynda áıelderdiń úlesi 39 paıyzǵa jetti. Bul týraly keshe Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda «Atameken» Ulttyq kásipkerler palatasy Isker áıelder keńesiniń tóraıymy Lázzat Ramazanova málim etti.
«Atameken» Ulttyq kásipkerler palatasy Isker áıelder keńesi sońǵy kezderi áıelder arasynda kásipkerlikti damytýǵa barynsha yqpal etýde. Statıstıkaǵa súıensek, búginde bizde 1 mln. 656 myńǵa tarta kásiporyn basshylary bar. Onyń ishinde 656 216-sy áıelder. Astana men Almaty qalalarynda bul kórsetkish 50 paıyzdan asty. Iаǵnı, elimizde bızneske názik jandylar belsendi tartylýda.
L.Ramazanovanyń aıtýynsha, osy maqsat úshin Qazaqstannyń kóptegen óńirinde áıelder kásipkerligin damytýǵa arnaıy kýrstar men trenıngter júrgizilýde.
«Áıelderge óziniń isin bastaý úshin árdaıym kómek pen qoldaý kerek. Olarǵa qarjylyq kómekten bólek, ishki kúsh-jigerin qoldaý qajet. Osy ishki jigerine arnaıy semınarlar men dárister eleýli kúsh beredi. Bul baǵytta biz aýdandarda jáne aýyldyq jerlerde belsendi jumystar júrgizýdemiz», dedi L.Ramazanova.
L.Ramazanovanyń habarlaýynsha, áıelder kásipkerligin yntalandyrýǵa 1,5 mlrd. teńge ınvestısııa tartylǵan. «Elimizdegi jaǵdaıǵa toqtalatyn bolsaq, shynymen de áıelder kásipkerligin damytý úshin tartylyp jatqan qarjylyq aǵymdar bar. Bul turǵyda eýropalyq, azııalyq bankter jáne «Damý» jelileri qamtylǵan», dedi. Onyń aıtýynsha, bul qarjy isker áıelderdi qoldaýǵa eleýli kómek boldy.
«Búginde 54-ke tarta áıel osy kómekti aldy, ıaǵnı bul syrtqy qoldaý sharalary bolyp tabylady. Alaıda, «Atameken» áıelderge aqysyz negizde qoldaý jasaýda. Atap aıtqanda, jobalardy qarjylyq súıemeldeý, bıznes-josparlardy daıarlaý jáne marketıngtik qyzmet kórsetý sharalary qamtylǵan. Qazaqstannyń árbir óńirinde biz osy kómekti aqysyz jasap jatyrmyz», dedi ol.
Dınara BITIKOVA,
«Egemen Qazaqstan».