Jarym-aý, sen – baqytty,
men – baqytty,
Budan asqan rahat joq janǵa, tipti.
Qurbylarǵa aıtar em: baqyt syıla,
Odan basqa bermeńder jarǵa túk te.
Baqyt bolsa...
Dúnıeniń bar baılyǵy,
О́mirdiń jyltyraǵan jaırańdyǵy –
Qajeti ne, dostarym, sondyqtan da,
Tek baqyt kerektigin oılan búgin.
Oılan búgin, erteń de, argúni de,
Múmkindik bar kúni de, tar kúni de.
Jaryńa baqyt syılar qudiret bar,
Týǵan jerdiń hosh ıis ár gúlinde.
Kúlkińde de, bııazy sózińde de,
Adaldyqpen nurlanǵan kózińde de,
Jaryńa baqyt syılar qudiret bar
Balańdy baýyryńa alǵan kezińde de.
Shyn baqyttan men keıde
muń tabamyn,
Maǵynasyz mastyqqa min taǵamyn.
Salqyn túnde oralyp saǵynyshpen,
Baqyt, bálkim, kórpesin qymtaǵanyń.
Aıta alman sypaıy bol,
sókpe dep te,
Baqytty bolar múmkin ókpelep te.
Táıir-aı, qymbat múlik emes qoı ol,
Baqyt úshin sondaılyq
kóp kerek pe?
Kóp kerek, baqyt úshin, az da kerek.
Baqyt bizdi bóler-aý sazǵa bólek.
Baqytqa batyrlyq ta, batyldyq ta,
Baqytqa náziktik pen naz da kerek.
Solaı, janym, baqyttyń
narqy qymbat,
Baqytqa jete almaısyń
ar shyǵyndap.
Bazarshydan baqytty
taba almaısyń,
Barsań da ýys-ýys altynyńdy ap.
Baqyttan arzan da joq,
qymbat ta joq.
Baqyt jaıyn bilmespiz
jyrlap ta kóp.
Jigitter, óziń – baqyt,
jaryń – baqyt,
Aıtam tek Baqytyńdy
qurmette dep!
Qorǵanbek Amanjol,
«Egemen Qazaqstan».