Keshe Astana qalasynda Aqtóbe oblysy ákimdiginiń bastamasymen jáne Syrtqy ister mınıstrliginiń qoldaýymen «Aqtóbe: ınvestısııalar – damý» taqyrybynda «Dıplomatııalyq bıznes klýbynyń» otyrysy ótti. Onda elshiler men dıplomatııalyq mıssııa basshylaryna atalǵan oblystyń ınvestısııalyq áleýeti men múmkindikteri tanystyryldy.
Aımaqtar men memleketter arasyndaǵy saýda, ekonomıkalyq jáne iskerlik baılanystardy nyǵaıtý, sondaı-aq, sheteldik ınvestorlardyń qyzyǵýshylyǵyn týdyrý maqsatynda uıymdastyrylǵan sharaǵa 43 memlekettiń ókilderi qatysty. Jıyn barysynda Syrtqy ister mınıstri Erlan Ydyrysov atalǵan bıznes-klýbtyń tartymdy jobalardy tanystyrý úshin tıimdi alańǵa aınalǵanyn aıtyp, onyń jumysyna joǵary baǵa berdi.
О́z kezeginde Aqtóbe oblysynyń ákimi Berdibek Saparbaev bul basqosýdyń mańyzdylyǵyna toqtalyp: «Elbasynyń negizgi saıasaty ekonomıkalyq damýdy qamtamasyz etip, halyqtyń turmysyn jaqsartý ekeni barshamyzǵa belgili. Osy rette, búgingi kezdesý elimizdegi, onyń ishinde Aqtóbe óńirindegi ekonomıkanyń damýyna jáne ınvestısııa tartýǵa óz úlesin qosady dep senemiz», – dedi.
Oblys basshysynyń aıtýynsha, qazirgi tańda óńirde qolaıly ınvestısııalyq ahýal qalyptastyrý úshin aıryqsha sharalar qolǵa alynýda. Bul rette kólik áleýeti, mıneraldy shıkizattyń mol qory, energetıkalyq jáne eńbek resýrstary erekshe ról atqarmaq. Ásirese, atalǵan tetikter aımaqtaǵy taý-ken óndirisin, hımııa ónerkásibin, metallýrgııa jáne aýyl sharýashylyǵyn damytýǵa mol múmkindik beredi.
Sonymen qatar, Berdibek Máshbekuly sońǵy 5 jylda Aqtóbe oblysynyń negizgi kapıtalyna 12,6 mlrd. AQSh dollary kóleminde ınvestısııa tartylǵanyn aıtyp: «Bul somanyń 4,7 mlrd.-y tikeleı shetel ınvestısııalarynyń úlesine tıesili. Osy rette Reseı, Qytaı, Ońtústik Koreıa, Nıderland, Germanııa syndy elderdi erekshe atap ótken jón. Bıyl da shetel ınvestısııasynyń qatysýymen birqatar jobany júzege asyrýdy josparlap otyrmyz. Olardyń ishinde sement, nıkel zaýyttary men turmystyq qatty qaldyqtardy óńdeý kásiporny bar», – dedi.
Odan bólek, oblys ákimi jyl basynan beri Syrtqy ister mınıstrliginiń yqpal etýimen aqtóbelik delegasııa birqatar elge arnaıy sapar jasap, ozyq iskerlik orta ókilderimen kezdeskenin jetkizdi. Sondaı-aq, ol Úndistan, Indonezııa, Chehııa, Germanııa, Fınlıandııa, Norvegııa jáne Shvesııa memleketteri dıplomatııalyq mıssııalarynyń basshylary Aqtóbege kelip, tájirıbe almasyp qaıtqanyna da nazar aýdardy.
Oblystyń halyqaralyq qarjy uıymdarymen de birlesip nátıjeli jumys jasap otyrǵany jóninde B.Saparbaev: «Bıyl Aqtóbe – Atyraý – Astrahan baǵytyndaǵy joldyń qurylysy bastalady. Bul jumysty Azııa damý banki qarjylandyrady. Sondaı-aq, búginde Astana – Arqalyq – Aqtóbe oblysy – Aqtaý baǵytyndaǵy joldyń qurylysy qarastyrylýda. Atalǵan joba da halyqaralyq uıymdardyń esebinen qarjylandyrylmaq. Al qazirgi tańda quny shamamen 7 mlrd. teńge bolatyn sýmen jáne jylýmen qamtamasyz etý salasynda qolǵa alynǵan jobalardy Eýropa qaıta qurý jáne damý banki qarjylandyryp otyr», – dedi.
Aqtóbe oblysynyń terrıtorııasy boıynsha elimizde 2-oryn alatynyna nazar aýdarǵan óńir basshysy jer kóleminiń ózi ınvestorlardyń qyzyǵýshylyǵyn oıatatynyn aıtty. Sondaı-aq, óńirdiń Azııa men Eýropanyń arasyn jalǵap jatqanyn, eldegi avtomobıl, áýe jáne temirjoldardyń basym bóligi oblys arqyly ótýine baılanysty tranzıttik aımaq bolyp sanalatynyna toqtalyp, ınvestısııa salýǵa múmkindik mol ekenine erekshe mán berdi.
Jalpy, jıyn barysynda qatysýshylar nazaryna oblystaǵy azyq-túlik, taý-ken óndirý, hımııa ónerkásibi, metallýrgııa jáne qonaq úı bıznesi boıynsha quny 1,2 mlrd. AQSh dollary bolatyn 11 joba usynyldy. Budan bólek, bıyl oblysta 104,7 mlrd. teńgeniń 6 jobasyn júzege asyrý josparlanyp otyrǵany aıtyldy.
Shara sońynda ınvestısııalyq jobalardyń júzege asyrylý barysyn aı saıyn qadaǵalap otyratyn elshilikter men ákimdiktiń jaýapty qyzmetkerlerinen turaqty jumys tobyn qurý týraly sheshim qabyldandy. Sondaı-aq, B.Saparbaev qyzyǵýshylyq tanytqan elderge birlesken bıznesti kúsheıtý úshin aqtóbelik kásipkerlerden qurmetti konsýldar taǵaıyndaýdy usyndy jáne osy baǵytta tolyqqandy kómek kórsetýge daıyn ekenin jetkizdi.
Elaman QOŃYR,
«Egemen Qazaqstan».
Sýretterdi túsirgen
Erlan OMAROV.