Pákistannyń Lahor qalasynda asa iri terrorlyq akt jasaldy. Qaladaǵy saıabaqta jasalǵan jarylys saldarynan, sońǵy málimet boıynsha, 71 adam kóz jumsa, onyń 25-i bala kórinedi. Bul týraly Qytaıdyń «Sınhýa» agenttigi habarlady. 300-den astam adam jaraqat alǵan.
Aýyr jaralanǵandar da kóp sekildi. Sondyqtan, qurbandyqtar sany arta túsýi yqtımal delinip otyr. Al jarylysty jankeshti saıabaqqa kireberis jerde jasapty. О́ıtkeni, bılet satatyn kassa mańynda kezek kútken adam kóp bolǵan. Lańkestiń qaza tabatyndar kóp bolsyn degen maqsatpen ádeıi sondaı adamdar kóp shoǵyrlanǵan jerdi tańdaǵany ańǵarylady. Aldyn ala málimetke qaraǵanda, terrorshy 8-den 10 kılogramǵa deıingi jarylǵyshty jarǵan. Jarylysqa jaýapkershilikti «Talıbanmen» baılanysy bar «Djamaat-ýl-Ahrara» lańkestik toby óz moınyna alypty.
Palmıra qalasy azat etildi
London qalasynyń meri Borıs Djonson Sırııa áskerıleri men prezıdent Bashar Asadty Palmıra qalasyn azat etkeni úshin maqtap, madaqtady. Sondaı-aq, ol bul úderistegi Reseı men prezıdent Vladımır Pýtınniń rólin de atap ótti. Bul týraly Brıtanııa astanasynyń basshysy «The Telegraph» gazetindegi óziniń baǵanasynda jazǵan.
B.Djonsonnyń jazýynsha, Asadtyń da adam súıer qylyǵy joq. Deı turǵanmen, «Islam memleketi» (Qazaqstanda tyıym salynǵan) delinetin qanisher toptyń qataldyǵy men qanquılylyǵy sekildi jaýyzdyqty álem áli kózben kórgen joq. Osy sebepti, Sırııanyń úkimettik áskerleriniń jeńisine amalsyz qýanasyń. London meriniń pikirinshe, «Islam memleketi» sekildi lańkestik toptar jer betinen túp-tamyrymen joıylýy tıis.
Úndistanda jańa zymyran synalady
Ústimizdegi jyldyń qyrkúıek aıynda Reseı men Úndistan birlesip jasaǵan BrahMos zymyranynyń avıasııalyq nusqasy synaqtan ótkiziledi. Bul týraly BrahMos Aerospace konsorsıýmynyń atqarýshy dırektory Sýdhır Kýmar Mıshra málimdedi, dep habarlady Reseıdiń «Novostı» aqparat agenttigi.
О́tken jyldyń naýryz aıynda Sý-30 áskerı ushaǵynyń konstrýksııasyna birqatar ózgeris engizilip, zymyran tasyǵyshtyń qýattylyǵyn arttyrý kózdelgen bolatyn. Sóıtip, Úndistannyń atalǵan korporasııasynyń paıdalanýyndaǵy 42 Sý-30 ushaǵyn qaıta jańǵyrtý týraly sheshim qabyldanyp otyr. Bul úshin Úndistan tarapynan 1,1 mıllıard dollar bólinedi. BrahMos qanatty zymyrany Úndistanda Reseı tarapynyń qatysýymen jasalady.
Qysqa qaıyryp aıtqanda:
Aljırde áskerı tikushaqtyń apaty saldarynan 12 adam qaza taýyp, 2-eýi jaralanǵan. Aldyn ala málimet boıynsha, apatqa tehnıkalyq aqaý sebep bolǵan. Aljır qarýly kúshteri shtabynyń bastyǵy apat boıynsha tekserý júrgizýdi tapsyrdy.
Aǵylshynnyń «The Independent» gazeti Sırııanyń Palmıra qalasynyń azat etilýin úndemeı qarsy alǵan AQSh prezıdenti B.Obama men Ulybrıtanııa premeri D.Kemerondy syn tezine aldy. Basylymnyń ustanymynsha, Eýropany dirildetken lańkesterdiń jeńilisine únsizdik tanytý – múldem jaraspaıtyn qylyq.
Reseıdiń «Aeroflot» áýe kompanııasy Qazaqstan Kólik jáne kommýnıkasııa mınıstrliginiń azamattyq avıasııa komıteti tıisti ruqsat bergennen keıin Qazaqstanǵa ushýlaryn qaıta qalpyna keltiretin boldy. Turaqty ushýlar ruqsat berý merzimi aıaqtalǵan 26 naýryz kúni tústen keıin toqtatylǵan edi.
Reseıdiń Chelıabi oblysynda 6 jasar balanyń anasy ulym jumaqqa barady degen kórsoqyrlyqpen ony óltirýge barǵan. Áıeldiń sózine qaraǵanda, túnde ol balań jumaqta bolýy tıis degen daýystar estipti-mis. Teksere kelgende, áıeldiń marıhýana qoldanǵany belgili bolǵan. Oǵan qarsy qylmystyq is qozǵalypty.
Segiz nemere-jıeni bar úmitker
AQSh prezıdenttigine kandıdat Donald Tramp kezekti márte ata atanǵan. Bul týraly «Assoshıeıted press» agenttigi habarlady. Djared Kýshnermen nekede turǵan mıllıarderdiń qyzy Ivanka Tramp ómirge úshinshi sábıin ákelgen. Jalpy alǵanda, bul prezıdenttikten úmitkerdiń 8-shi nemeresi eken.
Ivanka Tramp – kásipker, fotomodel jáne jazýshy kórinedi. Donald Tramptyń bes balasynyń biri. Al Ivanka Tramp ómirge bala ákelgenderi úshin jubaıy Djared Kýshner ekeýi óte baqytty ekendikterin aıtyp otyr. Al Kýshnerdiń nemen aınalysatyny týraly bul aqparatta eshteńe aıtylmaıdy. 69 jastaǵy Donald Tramp eki ret úılengen. Alǵashqy nekesinen úsh bala súıse, 45 jastaǵy ekinshi áıelinen eki balasy bar.
Týrıst tartýdyń jańa amaly
Vetnam bıligi Reseıden týrıster tartýǵa sheshim qabyldady. Ol úshin reseılikterge soǵys bolǵan jerlerge ekskýrsııa jasatpaq. Vetnam týrızm komıteti basshysynyń orynbasary Ngýen Kýok Hangtyń sózine qaraǵanda, Vetnamdaǵy 60-70-jyldardaǵy soǵysta KSRO úlken kómek kórsetken.
Sondyqtan, deıdi Ngýen Kýok Hang, soǵys bolǵan jerlerdi kózderimen kórýge qyzyǵýshylyq tanytatyn reseılikter az bolmaýy tıis. Budan bólek, Vetnam reseılik týrısterge shyǵys medısınasy boıynsha qyzmet usyna alady. Týrıster úshin 2015 jyldyń jeltoqsanynan bastap Fýkýok aralynda ań-qustyń 540 túri bar Ońtústik-Shyǵys Azııadaǵy alǵashqy jáne jalǵyz safarı-park jumys isteı bastaǵan. Sheteldikterge osynyń ózi úlken qyzyǵýshylyq týdyratyn jaıt bolsa kerek.
Kýshanashvılıge Ýkraınada oryn joq
Ýkraınanyń qaýipsizdik qyzmeti reseılik jýrnalıst Otar Kýshanashvılıdiń Ýkraınaǵa kirýine tyıym saldy. Tyıym merzimi – 3 jyl. Buǵan deıin Ýkraına Joǵarǵy radasynyń depýtaty Mustafa Naıem Kýshanashvılıge qatysty osyndaı shara qoldaný qajet degen turǵyda másele kótergen eken.
M.Naıem – Ýkraına prezıdenti Petr Poroshenkonyń blogynan depýtat. Onyń mundaı másele kóterýiniń sebebi, shetel azamaty bóten memleket – Ýkraına premer-mınıstriniń ashyq túrde ar-namysyna tıgen. О́ziniń sózine aıǵaq retinde M.Naıem reseılik jýrnalıstiń telearna efırinen aıtqan myna sózin keltiredi: «Men barmaqshy bolyp otyrǵan el premer-mınıstriniń tek bir kóz salysy ǵana eldegi psıhopatııa deńgeıiniń óte joǵary ekenin bildiretin sekildi».
Internet materıaldary negizinde ázirlendi.