QARAǴANDY. 29 naýryz. Qaraǵandyda jalǵan qujattar boıynsha bankterdiń birinen jarty mıllıard teńgege jýyq nesıe alǵan burynǵy kásipker isti boldy. Bul týraly Qaraǵandy oblystyq sottyń baspasóz qyzmetine silteme jasaǵan egemen.kz tilshisi habarlady.
Qaraǵandynyń turǵyny Vıtalıı Barabanov jalǵan qujattar arqyly ózin tabysty kásipker retinde kórsetip, bankterdiń birinen 547 000 000 teńge nesıe alǵan.
Bul aqshaǵa ol qymbat avtomobılder, jyljymaıtyn múlik satyp alyp, kýrorttarda demalǵan. Polısııa qyzmetkerleri ony bank ókilderi dabyl qaqqannan keıin ustady. Tekserý barysynda, onyń bankke usynǵan qujattarynyń jalǵan ekendigi anyqtaldy. Sot Vıtalıı Barabanovty 6 jyl 8 aıǵa bas bostandyǵynan aıyryp, dúnıe múlkin tárkiledi.
Qaırat Ábildınov.
Derek: Qaraǵandy oblystyq sottyń baspasóz qyzmeti.
Foto: ru.sputnik.kg.