Prezıdent janyndaǵy Ortalyq kommýnıkasııalar qyzmetinde ótken kezekti baspasóz máslıhaty «Bıznestiń jol kartasy-2020: bıznesti servıstik qoldaý» taqyrybyna arnaldy. Onda «Atameken» UKP basqarma tóraǵasynyń orynbasary Tólemis Shotanov búginde kásipkerlikti damytýǵa barynsha múmkindik jasalyp jatqandyǵyn aıtty.
T.Shotanovtyń málimdeýinshe, «Atameken» UKP qoldaýymen byltyr 1600 jańa kásiporyn ashylypty. 2015 jyly ulttyq kásipkerler palatasy shaǵyn jáne orta bıznes ókilderine 30 myńnan astam qyzmet kórsetken. Bul 2014 jylǵy kórsetkishten eki ese kóp bolyp otyr.
«Sonyń arqasynda biz 1600 jańa kásiporynnyń ashylýyna qoldaý jasadyq. 2800 kásipkerlik sýbektisi bankterden qarjy aldy. 3600 kásipkerge jobalaryn tolyqtaı júrgizip berdik. Osynyń nátıjesinde olar óz jobalaryna 30 mlrd. teńge qarjy tartty», dep atap ótti T.Shotanov.
UKP tóraǵasy orynbasarynyń habarlaýynsha, qyzmet kórsetý maqsattaryna 5 jyldyq merzimge 1,6 mlrd. teńge bólingen.
«Búginde Qazaqstanda bıznesti qoldaýǵa baǵyttalǵan 10 memlekettik baǵdarlama bar. Onyń ishinde eń tıimdisi ári suranysqa ıe dep «Bıznestiń jol kartasy-2020» baǵdarlamasyn aıtýǵa bolady. Bul baǵdarlamanyń eki komponenti bar, ıaǵnı qarjylyq jáne qarjylyq emes bóligi. Qarjylyq jaǵynan «Damý» kásipkerlikti damytý qory kómektesse, qarjylaı emes komponentterine «Atameken» ulttyq kásipkerler palatasy jaýapty», dedi T.Shotanov. Onyń aıtýynsha, qarjysyz júzege asyrylatyn «Iskerlik baılanystar» jáne «Aǵa senorlar» dep atalatyn taǵy eki joba bar. «Iskerlik baılanystar» kásipkerlerdi shetelde taǵylymdamadan ótkizýge arnalǵan. Al, ekinshisi «Aǵa senorlar», kerisinshe, damyǵan elderdiń tájirıbeli mamandaryn Qazaqstanǵa shaqyrýǵa arnalǵan. Joǵaryda atalǵan 1,6 mlrd. teńge osy eki komponentti júzege asyrýǵa bólinip otyr. Bes jyl boıy júzege asyramyz dep josparlap otyrmyz. Qarjy kólemi qarjylyq daǵdarysqa qaramastan ózgerissiz bolady», dedi ulttyq palata ókili. Sondaı-aq, ol kásipkerler palatasy Ulttyq ekonomıka mınıstrligine otandyq bızneske qyzmet kórsetý aıasyn keńeıtý baǵytynda usynystar engizip otyrǵandyǵyn atap ótti.
«Qazirgi ýaqytta bizdiń tarapymyzdan kásipkerlerge kórsetiletin 8 qyzmet túri bar: zańnamalyq, býhgalterlik, kedendik, memlekettik satyp alý, menedjment, marketıng, sapa deńgeıin baǵalaýdyń menedjmenttik júıesi jáne IT-tehnologııalar. Bul jerde sapa deńgeıin baǵalaýdyń menedjmenttik júıesi bizdiń elde úlken suranysqa ıe emes ekendigin kórip otyrmyz», dedi T.Shotanov. Onyń aıtýyna qaraǵanda, kásipkerler qazir memleket-jekemenshik seriktestigi tetikterine qatysty aqparattarǵa kóp qyzyǵady. «Máselen, byltyr memleket-jekemenshik seriktestik týraly zań shyqqan bolatyn. Bul kásipkerlerge qarajattyń jetispeýshiligi jaǵdaıynda úlken múmkindikter ashyp otyr. Kásipkerler osynyń aıasynda jobany qalaı daıyndaý qajettigin, reestrge qalaı kirýge bolatynyn surap jatyr. Biz Ulttyq ekonomıka mınıstrligine otandyq bızneske qyzmet kórsetý aıasyn keńeıtý baǵytynda birqatar usynystar engizip otyrmyz. Sonyń ishinde memleket-jekemenshik seriktestigi salasynda bızneske keńes berý qyzmetin engizý týraly máseleni de kóterdik», dedi T.Shotanov.
Dınara BITIKOVA,
«Egemen Qazaqstan».